جھاڑکھنڈ: بھارت میں پولیس اہلکاروں نے مل کر سادہ لباس میں ملبوس فوجی اہلکار کی درگت بنا ڈالی۔
بھارتی میڈیا رپورٹ کے مطابق ریاست جھارکھنڈ کے ضلع چترا میں کورونا ایس او پیز پر عملدرآمد کرانے کی ڈیوٹی پر موجود پولیس اہلکار نے اپنے ہی ملک کی سرحد کے محافظ فوجی اہلکار کی ماسک نہ پہننے پر پٹائی کردی۔
بھارتی فوجی پون کمار یادیو کی پولیس اہلکاروں کے ہاتھوں پٹائی کی ویڈیو سوشل میڈیا پر وائرل ہوگئی۔
ایس پی راکیش رنجن نے ویڈیو سوشل میڈیا پر وائرل ہونے پر تینوں پولیس اہلکاروں اور دو افسران کو معطل کردیا اور واقعے کا مقدمہ درج کرلیا گیا۔
झारखंड के चतरा में मास्क चेकिंग अभियान के दौरान पुलिसकर्मियों ने सरेआम आर्मी जवान को बेरहमी से पीटा।सड़क पर पटककर लाठी-डंडो और लात-घूसों से की पिटाई। #jharkhand pic.twitter.com/kLNTc6g8Yv
— Sohan singh (@sohansingh05) September 1, 2021
ایس پی کا کہنا ہے کہ واقعہ ہمارے علم میں آیا کہ فوجی جوان اپنی موٹر سائیکل پر سوار تھا اور اس نے ماسک نہیں پہنا تھا جب پولیس ٹیم نے اسے روکا تو اس نے مبینہ طور پر ان سے بدتمیزی کی جس کے بعد انہوں نے اسے مارا پیٹا۔
انہوں نے بتایا کہ دو کانسٹیبل اور ایک ہیڈ کانسٹیبل کو معطل کردیا گیا ہے لیکن غلطی دونوں فریقین کی تھی چاہے فوجی جوان ہو یا عام آدمی پولیس اہلکاروں سے اس طرح کا رویہ کی توقع نہیں کی جاسکتی۔
سوشل میڈیا صارفین نے بھی واقعے پر برہمی کا اظہار کرتے ہوئے پولیس اہلکاروں کے خلاف کارروائی کا مطالبہ کیا تھا۔
