پشاور : آرمی پبلک اسکولز کی جانب سے یوم شہداء اور دفاع پاکستان پر پروگرام کا انعقاد کیا گیا، پروگرام کا مقصد افواج پاکستان اور شہدا کی عظیم قربانیوں کو خراج عقیدت پیش کرنا تھا۔
اس موقع پر ننھے طلبہ نے ٹیبلوز، مختلف قسم کےخاکے، ملی نغموں، تقاریر سے افواج پاکستان شہدا کو زبردست سلام پیش کیا۔
آرمی پبلک اسکولز کے بچوں کی پرفارمنس نے شائقین کا لہو گرمادیا، بچوں نے پاک فوج زندہ باد اور پاکستان پائندہ باد کے فلک شگاف نعرے لگائے۔
اپنے خطابات میں طلبہ نے اس عزم کا اظہار کیا کہ جس طرح ہمارےآباؤ اجداد نے ملکی سلامتی کیلئے اپنی جانوں کا نذرانہ پیش کیا، اسی طرح ہم بھی اس وطن پر اپنی جانیں قربان کریں گے۔
مقررین کا کہنا تھا کہ آج کا دن وطن عزیز کی خاطر اپنی جانوں کا صدقہ دینے کا دن ہے، 6ستمبر کا دن تاریخ کے ان قابل قدر اور قابل احترام لوگوں کیلئے وقف ہے جنہوں نے وطن کی خاطر جانوں کا نذرانہ دیا اور شہادت کو گلے لگایا۔
طلبہ کا مزید کہنا تھا کہ لاہور میں چائے پینے کی خواہش کرنے والےدشمن کو افواج پاکستان نے شکست سے دوچار کیا اور بزدل دشمن کو جان بچانے کی خاطر واپس بھاگنا بھی پڑا۔
