ہالی وڈ سپراسٹارآرنلڈ شوازنیگرجلد پاکستان کا دورہ کریں گے -
The news is by your side.

Advertisement

ہالی وڈ سپراسٹارآرنلڈ شوازنیگرجلد پاکستان کا دورہ کریں گے

کیا آپ آرنلڈ کو جانتے ہیں، اگر ہاں تو آپ کے لیے خو شخبری ہے کہ آرنلڈ جلد ہی پاکستان کا دورہ کریں گے، وہ ان دنوں ماحولیاتی تبدیلی کی روک تھام کے لیے عمل پیرا ہیں

تفصیلات کے مطابق وزیراعظم کے مشیر برائے ماحولیاتی تبدیلی ملک امین اسلم نے اپنے ٹویٹر پیغام میں اعلان کیا ہے کہ ہالی وڈ کے سپر اسٹار اور کیلی فورنیا کے سابق گورنر آرنلڈ شوازنیگر نے پاکستان کا دورہ کرنے کا وعدہ کیا ہے۔

اپنے بیان میں ملک امین کا کہنا تھا کہ کہ آرنلڈ کا کہنا ہے کہ وہ پاکستان کا دورہ کرکے یہاں مرتب ہونے والے ماحولیاتی تبدیلیوں کے اثرات کو دنیا کے سامنے پیش کریں گے ۔ یاد رہے کہ پاکستان کا شمار دنیا کے ان ممالک میں ہوتا ہے جنہوں نے ماحولیاتی تبدیلیوں میں منفی کردار ادا نہیں کیا لیکن ان تبدیلیوں سے بہت زیادہ متاثر ہوئے ہیں۔

ملک امین اسلم پولینڈ میں منعقد ہونے والی 24 ویں کانفرنس آف پارٹیز میں پاکستان کی نمائندگی کررہے تھے ۔ یہ کنونشن اقوام متحدہ کے زیر اہتمام ماحولیاتی تبدیلیوں کی روک تھام کے لیے منعقد کیا جاتا ہے ۔ اس کانفرنس میں آرنلڈ کے علاوہ آسٹریا کے صدر الیگزنڈر وین بیلن اور دیگر درجنوں ممالک کے نمائندگان شریک تھے۔

یاد رہے کہ سنہ 2015 میں پیرس میں دنیا بھر کے ممالک کی ایک کانفرنس کا انعقاد ہوا تھا جہاں دنیا میں ماحولیاتی تبدیلیوں کی روک تھام کے لیے معاہدہ کیا گیا تھا۔ پاکستان بھی اس معاہدے کا دستخط کنندہ ہے اور پاکستان میں چلائی گئی بلین ٹری سونامی مہم کو عالمی سطح پر پذیرائی بھی حاصل ہوئی تھی ۔

حال ہی میں وزیر اعظم پاکستان کی جانب سے کلین اینڈ گرین پاکستان مہم کا آغاز کیا گیا ہے جس کے تحت صوبوں کے تعاون سے دس ارب درخت لگانے کا منصوبہ تیار کیا جارہا ہے۔

Comments

comments

یہ بھی پڑھیں