The news is by your side.

Advertisement

کورونا وائرس کا “علاج” کرنے والے باپ بیٹے گرفتار، خطرناک محلول برآمد

فلوریڈا : کورونا وائرس کی عالمی وبا کے بعد جہاں لوگ اپنی پریشانیوں میں مبتلا ہیں وہیں کچھ لوگ اس کو اپنی ناجائز آمدنی کا ذریعہ بھی بنا رہے ہیں۔ کہیں کوئی دیسی نسخے تجویز کررہا ہے تو کوئی گھر میں بیٹھ کر خطرناک کیمیکل سے دوا بنا رہا ہے۔

امریکی ریاست فلوریڈا میں باپ بیٹوں کو عمر قید کی سزا ملنے کا امکان ہے کیونکہ وہ جعلی طور پر کوویڈ 19 کے علاج کے لیے صنعتی بلیچ تیار کرکے فروخت کررہے تھے۔

غیر ملکی خبررساں ادارے کے مطابق گرفتار ملزمان صنعتی بلیچ کو گھر ہی میں پکا کر فروخت کرتے تھے۔ ابتدائی تفتیش کے مطابق گرفتار ملزمان نے ایک ملین ڈالرز کی صنعتی بلیچ پکا کر فروخت کی ہے۔

علاقہ پولیس کا کہنا ہے کہ باپ اوربیٹوں نے کورونا سے متاثرہ مریضوں کو صحتیابی کا جھانسہ دے کر جو کچھ فروخت کیا ہے وہ بلیچ ہے جسے انہوں نے اپنے گھر کی پچھلی سائیڈ کے شیڈ میں پکا کر تیار کیا تھا۔

برطانوی جریدے کے مطابق مارک گرینن نامی شخص آرک بشپ ہے اور اس نے تیار کردہ انتہائی خطرناک محلول کو ایم ایم ایس کے نام سے فروخت کیا اور بھاری منافع کمایا ہے۔

پولیس کی جانب سے کی جانے والی ابتدائی تفتیش کے مطابق گیرن اور اس کے تینوں بیٹوں نے دعویٰ کیا ہے کہ ان کا تیار کردہ محلول کووڈ 19کو ختم کرنے کی مکمل صلاحیت رکھتا ہے۔

پولیس کے مطابق عالمی وبا قرار دیے جانے والے کورونا وائرس کے آغاز پر انہوں نے اس محلول کو فروخت کرکے ہر ماہ ایک لاکھ 32 ہزار ڈالرز تک کمائے ہیں۔

امریکہ کے سرکاری حکام کے مطابق وہ لوگ جو کچھ محلول فروخت کر رہے تھے وہ دراصل ایک بلیچ ہے جسے عام طور پر ٹیکسٹائل یا صنعتی کارخانے میں استعمال کیا جاتا ہے۔ حکام کے مطابق اس سے پیدا ہونے والی کھانسی انتہائی مہلک ثابت ہو سکتی ہے۔

گرفتار ملزمان میں 62 سالہ مارک گیرن اور اس کے تین بیٹے جوناتھن، جوزف اور اردن شامل ہیں۔ عدالت میں جرم ثابت ہونے پر انہیں عمر قید کی سزا کا سامنا کرنا پڑسکتا ہے۔

گرفتار ملزمان کی جانب سے یہ دعویٰ بھی کیا گیا ہے کہ ان کا تیار کردہ محلول جو دراصل کلورین ڈائی آکسائیڈ ہے، نہ صرف کوویڈ 19 کا علاج کرسکتا ہے بلکہ کینسر اور ملیریا سمیت دیگر بیماریوں میں بھی شفا کا سبب ہے۔

امریکی حکام نے واضح طور پرخبردار کیا ہے کہ گرفتار ملزمان کا تیار کردہ ایم ایم ایس محلول پینا انتہائی خطرناک ہے جو مہلک بھی ثابت ہوسکتا ہے۔

Comments

یہ بھی پڑھیں