لاہور : جناح ہاوس حملہ کیس میں گرفتار خدیجہ شاہ نے جیل میں بی کلاس مانگ لی، جیل حکام نے کہا کہ درخواست میرٹ پر ہوئیں تو محکمہ داخلہ کو بجھوا دی جائیں گی۔

تفصیلات کے مطابق 9 مئی کے واقعات کے سلسلے میں گرفتار خدیجہ شاہ نے جیل میں بی کلاس مانگ لی ،جیل حکام نے بتایا کہ خدیجہ شاہ نے آئی جی جیل خانہ جات کے نام درخواست بجھوائی ہے۔

جیل حکام کا کہنا تھا کہ درخواست کا جائزہ لیا جا رہا ہے، درخواست میرٹ پر ہوئیں تو محکمہ داخلہ کو بجھوا دی جائیں گی۔

گذشتہ روز انسداد دہشت گردی عدالت نے عسکری ٹاور پر حملے میں سابق وزیر خزانہ کی بیٹی خدیجہ شاہ کے جسمانی ریمانڈ دینے کی استدعا مسترد کرتے ہوئے جوڈیشل ریمانڈ پر جیل بھیج دیا تھا۔

انسداد دہشت گردی عدالت نے خدیجہ شاہ، ضم جاوید ، عالیہ حمزہ اور طبیہ راجہ سمیت 8 خواتین کی درخواست ضمانت پر مزید کارروائی 20 جون تک ملتوی کر دی تھی۔