لاہور : تحریک انصاف کے چیئرمین عمران خان نے شہید ارشد شریف کے اہل خانہ کو انصاف کی فراہمی کیلئے چیف جسٹس پاکستان کو خط لکھ دیا۔
اس حوالے سے ذرائع کا کہنا ہے کہ عمران خان نے اپنے خط میں شہید ارشد شریف قتل کیس کی آزادانہ جوڈیشل کمیشن کے ذریعے واقعے کی تحقیقات کا مطالبہ کیا ہے۔
واضح رہے کہ اس سے قبل بھی شہریوں کی جانب سے شروع کی جانے والی مہم میں اب تک ہزاروں پاکستانی چیف جسٹس کو خط لکھ چکے ہیں۔
مزید پڑھیں : شہید صحافی ارشد شریف کی بیٹی کا سپریم کورٹ کے ججز کے نام خط
یاد رہے کہ گزشتہ روز شہید صحافی ارشد شریف کی صاحبزادی علیزہ ارشد نے انصاف کے حصول کیلیے سپریم کورٹ کے ججز کے نام خط لکھ دیا۔
علیزہ ارشد نے خط میں سپریم کورٹ کے ججز سے جوڈیشل کمیشن بنانے کا مطالبہ کرتے ہوئے لکھا ہے کہ ’میں اپنے والد کے لیے انصاف کے حصول کے لیے خط لکھ رہی ہوں۔‘
علیزہ ارشد نے لکھا کہ والد کی نقل و حرکت محدود ہوگئی اور جان سے مارنے کی دھمکیاں ملنا شروع ہوگئیں جب معاملہ بگڑا تو میرے والد اپنی جان اور عزت بچانے کے لیے وطن چھوڑنے پر مجبور ہوئے وہ ملک چھوڑ کر نہیں جانا چاہتے تھے۔
ایک ماہ قبل نومبر کے آغاز میں شہید ارشد شریف کی والدہ نے بھی چیف جسٹس آف پاکستان کو خط لکھ کر ہائی پاورجوڈیشل کمیشن تشکیل دینے کا مطالبہ کیا تھا۔
ارشد شریف کی والدہ نے چیف جسٹس آف پاکستان جسٹس عمرعطا بندیال کو لکھے گئے خط میں کہا تھا کہ میرے بیٹے کی شہادت کیخلاف حکومت کے ظالمانہ اقدامات کا نوٹس لیا جائے، مجھے اور ارشد شریف کے یتیم بچوں کو انصاف دلائیں۔
