The news is by your side.

Advertisement

دنیا پر امریکا کی حکمرانی ختم ہونے کو ہے

واشنگٹن: بین الاقوامی تعلقات کے جریدے میں شائع شدہ ایک مقالے میں دعویٰ کیا گیا ہے کہ عالمی سطح پر چین کی ترقی کا راستہ روکنے میں ناکامی کے بعد امریکا اپنی سابقہ طاقت کھو بیٹھا ہے، دنیا پر امریکا کی حکمرانی کا دور ختم ہو رہا ہے۔

امریکی بین الاقوامی تعلقات کے جریدے نیشنل انٹرسٹ میں شائع شدہ ایک مقالے کے مطابق چین کی عالمی سطح پر ترقی کا راستہ روکنے میں اور اپنے دشمنوں کے لیے کیے گئے اقدامات میں ناکامی سے ثابت ہوتا ہے کہ امریکا اپنی سابقہ طاقت کھو بیٹھا ہے۔

مقالے میں کہا گیا ہے کہ سرد جنگ کے بعد امریکا کی زیرِ قیادت شروع ہونے والا واحد قطبی عالمی نظام اب تبدیل ہونا شروع ہو گیا ہے۔

مقالے میں افغانستان اور عراق میں امریکا کی ہزیمت کی طرف توجہ مبذول کروائی گئی اور کہا گیا کہ واشنگٹن نے مشرق وسطیٰ میں خاص طور پر شام، یمن اور لیبیا کے بحرانوں سے متعلق کوئی مؤقف اختیار کرنے کا کام انقرہ، ماسکو اور تہران پر چھوڑ دیا ہے۔

ان عناصر کے ساتھ ساتھ چین کی عالمی سطح پر ترقی کا راستہ روکنے میں اور اپنے دشمنوں کے لیے اٹھائے گئے اقدامات میں ناکامی سے ثابت ہوتا ہے کہ امریکا اپنی سابقہ طاقت کھو بیٹھا ہے۔

مقالے میں اس پہلو پر بھی غور کیا گیا ہے کہ واحد قطب والے عالمی نظام کے بعد نیا عالمی نظام کیا ہوگا۔

تجزیے میں کہا گیا کہ اس وقت امریکا، چین اور روس کی شراکت سے کثیر قطبی یا پھر 2 قطبی نظام جیسے مختلف نظام ایجنڈے پر ہیں۔ یہ متعدد عالمی نظام ایک دوسرے کے ساتھ مسلسل رقابت کی حالت میں ہیں اور کسی ایک نظام کے غالب ہونے میں بیسیوں سال کا عرصہ لگ سکتا ہے۔

Comments

یہ بھی پڑھیں