لاہور : پنجاب میں پہلی مرتبہ سرکاری سطح پر جدید اور مہنگی ترین مصنوعی اعضاء کی ٹیکنالوجی ”بایونکس“ کا آغاز کردیا گیا۔
بایونکس“ ٹیکنالوجی سے بنے اعضاء میں دماغ کے سگنل کے مطابق حرکت دینے کی صلاحیت ہوتی ہے, وزیراعلیٰ مریم نوازشریف نے چھ سالہ سہیل کو ”بایونکس“ ٹیکنالوجی کے مصنوعی بازو لگوا دیے۔
وزیراعلی مریم نواز شریف کرنٹ لگنے سے کہنی کے نیچے بازو سے محروم عقیل کو اسٹیج پر خود لے کر آئیں۔
دماغ سے خود کار سگنل ملنے پر حرکت کرنے والے بازو کی تنصیب سے ننھے سہیل کی زندگی بدل گئی۔
کمسن سہیل نے حادثے کے بعد پہلی مرتبہ اپنے دونوں ہاتھوں کو حرکت دی، تالیاں بجا کر بھرپور مسرت کا اظہار کیا۔
وزیراعلیٰ پنجاب مریم نوازشریف نے ننھے سہیل سے ہاتھ ملا کر ہائی فائیو کیا اور سہیل کی حوصلہ افزائی اور پیار کیا۔
وزیراعلیٰ مریم نوازشریف نے کم سن سہیل کو اپنے ساتھ اسٹیج سے واپس لائیں، وزیراعلیٰ مریم نواز شریف نے اسپیشل افراد کیلئے معاون آلات کے سب سے بڑے پراجیکٹ کا افتتاح کردیا۔
وزیر اعلی مریم نواز شریف نے خود کار وہیل چیئر، پیڈز وہیل چیئر، ٹرائی وہیل اسکوٹی اور دیگر معاون آلات دئیے اور حوصلہ افزائی کی۔
تقریب میں پنجاب بھر سے 300 سے زائد اسپیشل افراد نے شرکت کی، تقریب میں آمد پر دو پیاری خاص بچیوں عائزہ اور عائشہ نے وزیراعلیٰ مریم نواز کا خیر مقدم کیا اور گلدستے پیش کئے۔
وزیراعلی مریم نواز شریف تقریب میں اسپیشل افراد کے درمیان بیٹھ گئیں، انہوں نے ایک ننھی بچے کو اپنے ساتھ بٹھایا اور پیار کیا۔
تقریب میں قوت گویائی سے محروم بچوں نے قومی ترانے، تلاوت و ترجمہ کو اشاروں کی زبان میں بیان کیا، صوبائی وزیر سہیل شوکت بٹ نے تقریب سے خطاب میں پراجیکٹ کی تفصیلات سے آگاہ کیا۔
صوبہ بھر میں اسپیشل افراد کو ایک ارب روپے کے مصنوعی اعضاء، آلہ سماعت، وہیل چیئر اور دیگر آلات مفت دئیے جائیں گے۔
اسپیشل افراد کو مینوئل وہیل چیئر، رولیٹر، ٹرائی سائیکل، الیکٹرک اور موٹر رائزڈ وہیل چیئر دئیے جائیں گے۔
ٹرائی موٹر سائیکل، واکنگ واکر، فریم موبائل ٹائلٹ چئیر، پیڈز وہیل چیئر، کنٹرولڈ وہیل چیئر بھی دی جائے گی، اسپیشل افراد کو ضرورت کے مطابق آلہ سماعت اور مصنوعی اعضاء بھی مفت دیے جائیں گے۔
