اسموگ کی بگڑتی صورتحال کے پیشِ نظر محکمہ ماحولیات اور موسمیات نے لاہور میں مصنوعی بارش برسانے کا فیصلہ کیا ہے۔
تفصیلات کے مطابق اسموگ سے بدتر ہوتی صورتحال میں لاہور میں 11 اور 12 نومبر کو مصنوعی بارش برسانےکی تیاریاں شروع کر دی گئیں۔
محکمہ موسمیات نےلاہور میں اسموگ کے تدارک کیلئے مصنوعی بارش کیلئے مانیٹرنگ شروع کر دی ہے۔
پنجاب یونیورسٹی کے پروفیسر ڈاکٹر منور صابر کا کہنا ہے کہ 11 اور 12 نومبر کو بادلوں میں 30 فیصد نمی کا امکان ہے نمی والے بادل آئے تو رواں سیزن مصنوعی بارش کا پہلا ٹرائل ہو گا، مصنوعی بارش کیلئے سازگار موسم درکار ہے اور تیاری مکمل کر لی گئی ہے۔
گورنر پنجاب سردار سلیم حیدر نے اپنے بیان میں کہا ہے کہ پنجاب کے بیشتر اضلاع میں اسموگ قابو سے باہر ہوچکی ہے اور لوگوں کی بڑی تعداد بیماریوں میں مبتلا ہوکر اسپتالوں میں پہنچ رہی ہے۔
گورنر پنجاب نے کہا کہ اسکول، کالجز اور تفریحی مقامات بند کرنے کے مثبت نتائج نہ مل سکے جب کہ مارکیٹوں کو رات 8 بجے بند کرنے کے احکامات کو تاجر تسلیم نہیں کر رہے۔
انہوں نے کہا کہ لاہور سمیت پنجاب کے بیشتر اضلاع میں آلودگی بڑھتی جا رہی ہے۔ یہ صورتحال اس بات کی متقاضی ہے کہ اسموگ کی روک تھام کے لیے عارضی طور پر پنجاب بھر میں ایمرجنسی نافذ کی جائے۔
گورنر پنجاب نے کہا کہ اسموگ انسانی صحت کے لیے بڑا مسئلہ ہے۔ اس پر مستقل طور پر قابون پانے کے لیے مشترکہ کوششیں کرنا ہوں گی اور متعلقہ تمام اداروں کو ایک پیج پر آنا ہوگا۔
واضح رہے کہ گزشتہ کئی روز سے پنجاب میں اسموگ کی صورتحال انتہائی تشویشناک ہوچکی ہے۔ اس دوران لاہور سمیت پنجاب کے کئی شہروں میں ایئر کوالٹی انڈیکس ایک ہزار سے زائد پر تجاوز کر چکا ہے جو انسانی صحت کے لیے انتہائی خطرناک ہے۔
پنجاب حکومت نے اس کے تدارک کے لیے کئی اقدامات کیے جن میں اسکولوں اور تفریحی مقامات بند، ہوٹلز اور شادی ہالز رات 8 اور 10 بجے بند کرنے، جنریٹر چلانے پر پابندی عائد کرنے سمیت کئی اقدامات شامل ہیں تاہم صورتحال پر اب تک قابو نہیں پایا جا سکا ہے۔
