19.8 C
Ashburn
بدھ, مئی 29, 2024
اشتہار

دوبارہ جیل گیا تو مودی سرکار مفت بجلی و پانی بند کر دے گی: کیجریوال

اشتہار

حیرت انگیز

نئی دہلی: جیل سے رہا ہوتے ہی عوامی پاور شو کا مظاہرہ کرتے ہوئے عام آدمی پارٹی کے کنوینر اروند کیجریوال نے کہا اگر وہ دوبارہ جیل گئے تو مودی سرکار دہلی والوں کی مفت بجلی و پانی بند کر دے گی۔

بھارتی میڈیا رپورٹس کے مطابق دہلی کے وزیر اعلیٰ اروند کیجریوال نے اتوار کو ایک جلسے سے خطاب میں کہا کہ اگر وہ دوبارہ جیل گئے تو بی جے پی عوام کی مفت بجلی اور پانی بند کر دے گی اور سرکاری اسکولوں اور اسپتالوں کو تباہ کر دے گی۔

کیجریوال نے کہا مجھے اس لیے جیل میں ڈالا گیا کیوں کہ عوام کے لیے 24 گھنٹے مفت بجلی اور علاج کا انتظام کیا، ہم نے دہلی میں 500 اسکول بنائے، اگر ووٹرز جھاڑو کا بٹن دبائیں گے تو ہمیں جیل جانے کی ضرورت نہیں پڑے گی۔

- Advertisement -

انھوں نے کہا کہ اگر وزیر اعظم نریندر مودی ملک بھر میں 5 ہزار اسکول بھی بناتے تو بہت اچھا ہوتا، لیکن وہ غلط سیاست کر رہے ہیں، یہ آمریت ہے، اور ہم سب کو اس آمریت کے خلاف لڑنا ہے۔

اروند کیجریوال نے کہا کہ بی جے پی والے 400 سیٹیں مانگتے پھر رہے ہیں لیکن جب ان سے پوچھا جاتا ہے تو وہ کہتے ہیں کہ ہم ملک سے ریزرویشن ختم کر دیں گے، اگر آپ چاہتے ہیں کہ ملک میں ریزرویشن اور جمہوریت کا خاتمہ نہ ہو تو ہر شخص کو ووٹ ڈالنے کے لیے جانا چاہیے اور جھاڑو کا بٹن دبانا چاہیے۔

انھوں نے کہا جس طرح پیوٹن نے روس کا آئین تبدیل کیا اور اب وہاں انتخابات نہیں ہوتے، صرف پیوٹن کبھی وزیر اعظم اور کبھی صدر رہتے ہیں، اسی طرح بی جے پی حکومت ملک کا آئین بدلے گی اور الیکشن رکوائے گی۔

Comments

اہم ترین

ویب ڈیسک
ویب ڈیسک
اے آر وائی نیوز کی ڈیجیٹل ڈیسک کی جانب سے شائع کی گئی خبریں

مزید خبریں