کراچی : شہید ارشد شریف کی پہلی برسی پر صدر اور سی ای او اے آر وائی سلمان اقبال نے کہا کہ تحقیقات صحافت میں ارشد سے بہتر کوئی تھا نہ کوئی ہوگا، میرے بھائی اللہ تمہارے درجات بلند کرے، تم بہتر جگہ پر ہو۔
تفصیلات کے مطابق شہید ارشد شریف کی پہلی برسی پر صدر اور سی ای او اے آر وائی سلمان اقبال نے اپنے پیغام میں کہا کہ آج کے دن ایک سال پہلے ایک فون کال آئی جس نے میری زندگی بدل دی ، فون کال سے پتہ چلا کہ میرا بھائی ارشد شریف قتل ہوگیا ہے ، 23 سال سے خبر کی دنیا سے وابستہ ہوں، یہ خبرپہنچانا مشکل ترین تھا۔
سلمان اقبال نے بتایا کہ فون کال کے بعد خبر چلانے سے پہلے ارشدشریف کی فیملی کو بتایا، ارشد شریف نہ صرف میرا بھائی بلکہ میرا دوست بھی تھا۔
صدر اور سی ای او اے آر وائی کا کہنا تھا کہ ارشد کے قتل کے بعد میرے خلاف ایک مذموم پروپیگنڈا شروع کیا گیا، پہلے تو اس جھوٹی مہم نے مجھے جھنجھوڑ کر رکھ دیا ، پھر میں نے سوچا ارشد میری جگہ ہوتا تو وہ کیا کرتا، ارشد ہمیشہ مجھے کہتا تھا کہ ہمیں اللہ نے سچ بتانے کی ذمہ داری ہے۔
انھوں نے مزید کہا کہ آج بھی کچھ کٹھ پتلیاں پروپیگنڈا میں مصروف ہیں، جس کی مجھے پرواہ نہیں ، تحقیقات صحافت میں ارشد سے بہتر کوئی تھا نہ کوئی ہوگا، میرے بھائی اللہ تمہارے درجات بلند کرے، تم بہتر جگہ پر ہو، بچوں کی پرواہ مت کرنا، وہ میری ذمہ داری ہیں ، "Till we meet again”۔
