The news is by your side.

Advertisement

خواہش ہے کہ فائنل کراچی کنگز اور لاہور قلندرز کے درمیان کھیلا جائے، سلمان اقبال

کراچی : اے آر وائی نیٹ ورک کے سی ای او اور کراچی کنگز کے مالک سلمان اقبال نے کہا ہے کہ میری خواہش ہے کہ پی ایس ایل کا فائنل کراچی کنگز اور لاہور قلندرز کے درمیان کھیلا جائے، شاہد آفریدی کو مس کرتا ہوں۔

یہ بات انہوں نے ویڈیو کانفرنس کے ذریعے صحافیوں سے گفتگو کرتے ہوئے کہی، انہوں نے کہا کہ پاکستان سپرلیگ سیزن فائیو کامیابی سے ہوا ہے، بدقسمتی سے کرونا وائرس کی وجہ سے چیمپیئن کا فیصلہ نہ ہوسکا، تاہم رواں سال ورلڈ ٹی20 کپ کے بعد ونڈو نکلتی دکھائی دیتی ہے۔

سلمان اقبال کا کہنا تھا کہ ایلکس ہیلز نے برطانیہ جاتے ہی طبعیت کی خرابی کا میسج کیا، بعد ازاں ٹیم میٹنگ میں فیصلہ ہوا کہ تمام لوگوں کے ٹیسٹ کرائے جائیں، ڈین جونز نے ٹیسٹ مکمل ہونے تک ٹیم میدان میں اترانے سے انکار کردیا تھا۔

ایک سوال کے جواب میں  سلمان اقبال نے کہا کہ پی ایس ایل سیزن فائیو کا فائنل ضرور ہونا چاہیئے تاکہ نیا چیمپیئن آسکے، اگر نمبر ون ٹیم کو ٹرافی مل جائے تو اسپورٹس مین شپ کا مزہ نہیں رہتا۔

انہوں نے کہا کہ میری خواہش ہے کہ فائنل کراچی کنگز اور لاہور قلندرز کے درمیان کھیلا جائے، رمیز راجہ کو الیکس ہیلس کا نام نہیں لینا چاہیے تھا، اس وجہ سے  میرے اپنے دوست کرونا وائرس کے خوف میں مجھ سے مل نہیں رہے تھے۔

سلمان اقبال نے کہا کہ میرا پلیئنگ الیون کے انتخاب میں عمل دخل نہیں ہوتا ہے، چیڈوک والٹن اور محمد رضوان کا موازنہ نہیں کرسکتے، رضوان اوپر کے نمبر کے بہترین کھلاڑی ہیں، میرے خیال میں کپتان کو جلد تبدیل کرنا درست نہیں، عماد وسیم کو جب کپتان بنایا تو مسلسل ہم چار میچز جیتے تھے۔

انہوں نے کہا کہ شرجیل خان کو پاکستان ٹیم میں واپسی کا موقع ملنا چاہیئے، بابراعظم اور فخر زمان کی اوپنگ جوڑی مضبوط دکھائی نہیں دیتی، شرجیل خان کو اپنی فٹنس پر توجہ دینی چاہیئے، ڈین جونز جیسا بہترین کوچ ہر ٹیم کی ضرورت ہے، ڈین جونز پاکستانی کھلاڑیوں کو اچھے انداز سے جانتے ہیں۔

شاہد آفریدی سے متعلق ایک سوال کے جواب میں سلمان اقبال کا کہنا تھا کہ شاہد آفریدی کو بہت مس کرتا ہوں، وہ جب ریٹائر ہونگے تو انہیں کراچی کنگز کی کوچنگ کیلئے کہو‌ں گا۔

انہوں نے کہا کہ پاکستان سپر لیگ نے کھلاڑیوں کا اعتماد بحال کردیا ہے، پاکستان میں کرکٹ کو ختم ہونے نہیں دینگے، ملک میں کرکٹ کی بحالی کیلئے کافی محنت کی گئی ہے، کھلاڑی کی کھوج (ٹیلنٹ ہنٹ) گزشتہ سال منعقد نہیں ہوسکی تھی، میری راشد لطیف سے کوئی ناراضگی نہیں ہے، میں سمجھتا ہوں کہ ٹیلنٹ ہنٹ پروگرام راشد لطیف کے بغیر کرانا ناممکن ہے۔

سلمان اقبال کا کہنا تھا کہ پاکستان میں بریوو  مکسڈ مارشل آرٹس متعارف کروا چکے ہیں، رواں سال اکتوبر اور نومبر کے درمیان کراچی میں اگلا ایڈیشن منعقد کرائیں گے، اس کے علاوہ تیرہ مختلف شہروں میں ٹریننگ جم کھولنے کا بھی ارادہ ہے۔

Comments

یہ بھی پڑھیں