کراچی: عبدالستارایدھی کے یومِ وفات کو ’نیشنل چیریٹی ڈے‘ قرار دینے کے لئے اے آر وائی ڈیجیٹل نیٹ ورک کی مہم جاری ہے، جس میں گورنر سندھ عشرت العباد خان بھی شامل ہوگئے ہیں۔
تفصیلات کے مطابق معروف سماجی شخصیت عبدالستارایدھی کو خراج تحسین پیش کرنے کے لئے اے آروائی نیٹ ورک نے مہم کا آغاز کررکھا ہے، جس کا مقصد آٹھ جولائی یعنی ڈاکٹرعبدالستارایدھی کے یومِ وفات کوچیریٹی ڈے قراردیا جائے اوراب اس مہم میں گورنرسندھ ڈاکٹرعشرت العباد بھی شامل ہوگئے ہیں۔
عالمی سطح پر پہچانے جانے والے ممتاز سماجی رہنما آٹھ جولائی دوہزارسولہ کو طویل عرصے تک گردوں کے مرض میں مبتلا رہنے کے بعد سندھ انسٹیٹیوٹ آف یورولاجی اینڈ ٹرانسپلانٹ میں انتقال کرگئے تھے، انہیں مکمل ریاستی اعزاز کے ساتھ سپردِ خاک کیا گیا تھا۔
اے آر وائی بیورو چیف سندھ ایس ایم شکیل سے گفتگو کرتے ہوئے گورنر سندھ کا کہنا تھا کہ اے آروائی کی چیئرٹی ڈے کی تجویز کی مکمل حمایت کرتا ہوں، 8 جولائی کو نیشنل چیئرٹی ڈے قراردیا جائے۔
عشرت العباد خان نے کہا کہ ایدھی کا نام دنیا میں مانا جاتا ہے، ان کو خدمات کو ہرکوئی سراہتا ہے، چیریٹی کا تصور جو عبدالستار ایدھی نے دیا وہ بے مثال ہے۔
انھوں نے مزید کہا کہ پاکستان میں چیریٹی کا رجحان بہت زیادہ ہے، جسے مثبت سمت میں دینے کی ضرورت ہے۔
علاوہ ازیں اسپیکر پنجاب اسمبلی رانا اقبال، معروف گلوکار محمد افراہیم نے بھی عبدالستار ایدھی کو خراج عقیدت پیش کیا اور آٹھ جولائی کو نیشنل چیرٹی ڈے قرار دینے کی مہم میں شامل ہوگئے ہیں، جبکہ سیاستدان،فنکار، مذہبی رہنما اور عام افراد جوق در جوق حصہ بن رہے ہیں۔
