کراچی: اے آر وائی ڈیجیٹل کے نئے ڈرامہ سیریل ’پہلی سی محبت‘ کے ٹیزر نے ریلیز ہوتے ہی دھوم مچادی۔
تفصیلات کے مطابق اے آر وائی ڈیجیٹل کے نئے ڈرامے ’پہلی سی محبت‘ کا ٹیزر ریلیز ہوتے ہی مقبول ہوگیا، ڈرامے میں شہریار منور، مایا علی اور حسن شہریار خان (ایچ ایس وائی) مرکزی کردار ادا کررہے ہیں۔
ڈرامہ سیریل پہلی سی محبت کی ہدایت کاری کے فرائض انجم شہزاد نے انجام دئیے ہیں جبکہ اس کی رائٹر فائزہ افتخار ہیں، ڈرامے کی کاسٹ میں شہریار منور، مایا علی، شبیر جان، حسن شہریار یاسین، نوشین شاہ شامل ہیں۔
شہریار منور ڈرامے میں (اسلم ) نامی نوجوان کا کردار ادا کررہے ہیں جبکہ مایا علی (رخشی ) کے روپ جلوہ گر ہوں گی۔
ٹیزر میں شہریار منور او رمایا علی شاعری کرتے دکھائی دے رہے ہیں، شہریار منور (اسلم) خط لکھتے ہوئے کہہ رہے ہیں کہ ’تم میری محبت کی کتاب کا پہلا ورق ہو ،وہ پہلی محبت جو میں نے ایک جنگ کی طرح لڑی، وہ جنگ جس کو نہ مقدر ہار پایا نہ دل جیت سکا، کتنی انمول ہوتی ہے وہ پہلی محبت جو آخری بھی ہو، فقط تمہارا اسلم ۔‘
مایا علی (رخشی) خط کا جواب دیتے ہوئے کہتی ہیں کہ ’ کوئی بھی محبت کبھی آخری نہیں ہوتی، لیکن پہلی محبت ہمیشہ پہلی رہتی ہے، کھو جائے، چھن جائے، رک جائے تب بھی پاس رہتی ہے اور زندگی کی آخری سانس تک ساتھ نبھاتی ہے، تمہاری رخشی۔‘
ڈرامے کے تیسرے کردار حسن شہریار خان(اکرم) کے ہاتھ اسلم اور رخشی کا لکھا خط ہاتھ لگ جاتا ہے جس کے بعد وہ اس خط کو پھاڑتے ہوئے کہتے ہیں ’اس کو اندر بند کردیں چھ سات دن ہیں اللہ کریں عزت سے گزر جائیں، ایک بار بہن بیٹی کی بدنامی کا داغ گلے پڑ جائیں تو ساری عمر اسے دھونا پڑتا ہے۔‘
یاد رہے کہ اداکار شہریار منور کی ٹی وی اسکرین پر 7 سال بعد واپسی ہورہی جبکہ مایا علی بھی 4 سال کے بعد چھوٹے پردے پر نظر آئیں گی، اس سے قبل دونوں فنکار فلم پرے ہٹ لو میں ایک ساتھ جلوہ گر ہوئے تھے، مداح دونوں فنکاروں کی جوڑی کو دوبارہ سے ایک ساتھ دیکھنے کے لیےبے تاب ہیں۔
