کراچی: اے آر وائی ڈیجیٹل کے نئے ڈرامہ سیریل ‘اولاد‘ میں مرکزی کردار ادا کرنے والے سینئر اداکار محمد احمد اور اداکارہ مرینہ خان نے ڈرامے کی اہمیت بتادی۔
اداکار محمد احمد اور مرینہ خان نے اے آر وائی ڈیجیٹل کے پروگرام ’گڈ مارننگ پاکستان‘ میں شرکت کی، ڈرامہ سیریل ’اولاد‘ سے متعلق گفتگو کرتے ہوئے سینئر اداکار محمد احمد نے کہا کہ’ ڈرامے میں فیملی کی اہمیت کو اجاگر کیا گیا ہے، ڈرامے میں وہ چیزیں دکھائی گئی ہیں جنہیں لوگ یکسر بھولتے جارہے ہیں۔‘
ڈرامے میں ماں کا کردار ادا کرنے والی مرینہ خان کا کہنا تھا کہ ’وہ اپنے بچوں سے بہت زیادہ قریب ہیں وہ نہیں چاہتیں کہ گھرکوئی ایسی بات ہوجائے جس سے کوئی ایک بچہ ناراض ہوجائےیا گھر میں کوئی بدمزگی پیدا ہو۔‘
مرینہ خان کے مطابق ڈرامے میں یہ پیغام دیا گیا ہے کہ والدین نے بچوں کے لیے جو کچھ کرنا تھا وہ کرلیا اب بچوں کی باری ہے کہ وہ والدین کا سہارا بنیں لیکن بچوں کے رویے سے فیملی میں اتار چڑھاؤ آرہا ہے لیکن وہ نہیں چاہتیں کہ گھر میں کوئی بگاڑ پیدا ہو۔
واضح رہے کہ ڈرامہ سیریل ’اولاد‘ کی ہدایت کاری کے فرائض عابس رضا نے انجام دئیے ہیں، ڈرامے کی کاسٹ میں محمد احمد، مرینہ خان،حسن نیازی ، فرقان قریشی، نبیلہ زبیری، سنیتا مارشل، حنا جاویدشامل ہیں۔
ڈرامے کی پہلی قسط نشر کی جاچکی ہے جسے مداحوں کی جانب سے خوب سراہا جارہا ہے۔
ڈرامے میں آگے کیا ہونے جارہا ہے؟ کیا بیٹے اپنے والدین کو چھوڑ کر الگ ہوجائیں گے یا والدین بچوں کے رویے سے تنگ آکر انہیں الگ کردیں گے، یہ سب کچھ جاننے کے لیے ڈرامہ سیریل ‘اولاد‘ ہر منگل کی رات 8 بجے دیکھنا نہ بھولیں۔
