اسلام آباد: وفاقی وزیر منصوبہ بندی اسد عمر کا کہنا ہے کہ وزیراعظم ہاؤس میں یونیورسٹی کے قیام میں تاخیر نہیں ہونی چاہیے۔
تفصیلات کے مطابق وفاقی وزیر اسد عمر کی زیر صدارت وزیر اعظم ہاؤس میں یونیورسٹی کے قیام پر اجلاس ہوا جس میں پروفیسر ڈاکٹر عطا الرحمن نے شرکا کو یونیورسٹی کے قیام میں پیشرفت سے آگاہ کیا۔
اجلاس میں بریفنگ کے دوران بتایا گیا کہ یونیورسٹی میں 3 سینٹر آف ایکسیلنس اور 8 ڈیپارٹمنٹ ہوں گے، جدید ٹیکنالوجی کی ترقی پر خصوصی توجہ دی جائے گی، ابتدائی فزیبلٹی اسٹڈی کے لیے 200 ملین روپے درکار ہیں۔
وزارت سائنس و ٹیکنالوجی کو یونیورسٹی سے متعلقہ ٹیکنالوجی پر خصوصی کمیٹی بنانے کی ہدایت کی گئی ہے۔
اس موقع پر وفاقی وزیر اسد عمر کا کہنا تھا کہ مینوفیکچرنگ شعبے کومسابقتی بنانےکیلئےٹیکنالوجی سےروشناس کرنےکی ضرورت ہے، وزیراعظم ہاؤس میں یونیورسٹی کے قیام میں تاخیر نہیں ہونی چاہیے۔
یاد رہے کہ گزشتہ سال جولائی میں وفاقی کابینہ نے وزیراعظم ہاؤس میں یونیورسٹی قائم کرنے کے لیے دارالحکومت کے ماسٹر پلان میں مخصوص تبدیلی کی منظوری دی تھی۔
