اسلام آباد : اسپیکرقومی اسمبلی اسد قیصر نے کہا ہے کہ الیکشن کمیشن کے ممبران کی تعیناتی کے معاملے کو افہام و تفہیم سے حل کیلئے اپوزیشن سے مشاورت کی جائے گی۔
ان خیالات کا اظہار انہوں نے اسلام آباد میں الیکشن کمیشن ممبران کی تعیناتی سے متعلق مشاورتی اجلاس سے خطاب کرتے ہوئے کیا۔
اجلاس میں چیئرمین سینیٹ صادق سنجرانی اوراسپیکر قومی اسمبلی اسد قیصر کے علاوہ وزیرقانون بیرسٹر فروغ نسیم اور وزیرپارلیمانی امور اعظم سواتی بھی موجود تھے، اس کے علاوہ سیکرٹری قانون، سیکرٹری پارلیمانی امور اور قانونی ماہرین نے بھی اجلاس میں شرکت کی۔
اجلاس سے خطاب کرتے ہوئے اسپیکرقومی اسمبلی اسدقیصر نے کہا کہ ہم عدلیہ اور قانون کا احترام کرتے ہیں، الیکشن کمیشن کے ممبران کی تعیناتی کے مسئلہ کو قانون اور آئین کے مطابق حل کیا جائے گا۔
اسپیکرقومی اسمبلی کا مزید کہنا تھا کہ اس معاملے کو افہام و تفہیم سے حل کرنے کیلئے اپوزیشن جماعتوں سے مشاورت پر اتفاق کیا گیا ہے۔
انہوں نے کہا کہ معاملے کو خوش اسلوبی سے حل کرنے کی پوری کوشش کریں گے، اس سسلسلے میں اٹارنی جنرل اور قانونی ماہرین سے رائے بھی طلب کی گئی ہے۔
