پشاور: پی ٹی آئی کے رہنما اسد قیصر کا کہنا ہے کہ بانی پی ٹی آئی جلد جیل سے نکلیں گے اور وزیراعظم بنیں گے۔
اے آر وائی نیوز کے مطابق خیبرپختونخوا میں یوم پاکستان کی تقریب سے خطاب کرتے ہوئے پی ٹی آئی رہنما اسد قیصر نے ایک بیان میں کہا کہ بانی پی ٹی آئی نے پرواہ نہیں کی وہ ملک اور عوام کے لیے جیل میں ہے۔
اسد قیصر نے کہا کہ جو بھی ملک کو بری نظر سے دیکھے گا وہ آنکھیں نکال لیں گے، جس لیڈر نے ملک کو متحد کیا اس کو جیل میں ڈال دیا گیا ہے۔
انہوں نے کہا کہ چیف جسٹس نے کہا آئین و قانون کے تحت چلوں گا ان سے بڑی امید ہے، چیف جسٹس سے درخواست ہے آئین و قانون کے مطابق فیصلے کریں۔
پی ٹی آئی رہنما نے کہا کہ جب قوم مقصد کے لیے جدوجہد نہیں کرتی تو آگے نہیں بڑھتی، ملک میں آئین و قانون نام کی کوئی چیز نہیں ہے، خواتین جیلوں میں ہے جلسے جلوسوں کی اجازت نہیں، آپ اپنی مرضی سے کسی جماعت میں شامل نہیں ہوسکتے۔
اسد قیصر نے کہا کہ کوئی سوچتا ہے کہ اپنی مرضی سے ملک چلائے گا، فیصلے کرے گا تو وہ وقت چلا گیا، لیڈر شپ کو کہوں گا ضمنی الیکشن ہیں پنجاب میں جلسوں کا شیڈول بنائیں، ضمنی الیکشن میں عوام کے پاس جائیں گے جلسے کریں گے۔
انہوں نے مزید کہا کہ جن کے پاس مینڈیٹ نہیں وہ کس بنیاد پر اسمبلی میں بیٹھیں ہیں، جب تک عوام کا مینڈیٹ نہیں لیتے آپ کو چین سے بیٹھنے نہیں دیں گے۔
