اسلام آباد : سابق وزیر خزانہ اسد عمر نے دعویٰ کیا ہے کہپی ٹی آئی نے 3سال میں 54 لاکھ نوکریاں دیں، یقین نہیں آتا تو پی ڈی ایم حکومت کی رپورٹ دیکھ لیں۔
تفصیلات کے مطابق سابق وزیر خزانہ اسد عمر نے عدالت میں پیشی کے موقع پر میڈیا سے گفتگو کرتے ہوئے کہا کہ پاکستان ایک سیاسی دندل کے اندر پھنسا ہوا ہے، تمام لیڈرملک کو سیاسی استحکام کی طرف لےکر آئیں۔
سابق وزیر کا کہنا تھا کہ سب سے بڑی سیاسی جماعت تحریک انصاف ہے، پی ٹی آئی کےساتھ بیٹھیں اورایک مشترکہ ایجنڈا بنائیں، ملک کوسیاسی بحران سے کیسے نکالنا ہے اس کی طرف جائیں۔
انھوں نے دعویٰ کیا کہ تحریک انصاف کے ابتدائی تین سال میں چون لاکھ روزگار کے مواقع پیدا کیے، یقین نہیں آتا تو پی ڈی ایم حکومت کی رپورٹ دیکھ لیں، چھے فیصد سے معیشت کی ترقی ہورہی تھی، پچھلے تین سال میں یہ اوسطاً ایک اعشاریہ چھے فیصد ہوگئی ہے۔
سابق وزیر خزانہ نے مزید کہا کہ الحمدللہ ہماری افواج نے ٹھوک کر بھارت کو جواب دیا، جو طاقتور ہے اس سے حکومت پیسہ نہیں نکلواسکی۔
بجٹ کے حوالے سے ان کا کہنا تھا کہ اس بجٹ میں بھی بڑے جاگیرداروں پر کوئی ٹیکس نہیں لگا، میوزیکل چیئرچلتی رہی تو عوام کو کچھ نہیں ملے گا۔
