فیصل آباد : جنرل سیکرٹری پاکستان تحریک انصاف اسد عمر کا کہنا ہے کہ راناثناعوام پرگولے برسانے کی تیاری کر رہے ہیں۔
تفصیلات کے مطابق جنرل سیکرٹری پاکستان تحریک انصاف اسد عمر نے میڈیا سے گفتگو کرتے ہوئے کہا کہ 11 نومبر کو سارے پاکستان سے قافلے اسلام آباد پہنچیں گے جبکہ گلگت بلتستان سے آنے والے لوگ ایک دن پہلے وہاں پہنچ جائیں گے۔
اسد عمر کا کہنا تھا کہ آپ دیکھیں گے پورا پاکستان اسلام آباد پہنچے گا، عوام پرجوش ہے اور اپنا فیصلہ کر چکی ہے، قوم کسی اور اپنی تقدیر کا فیصلہ کرنے کا اختیار نہیں دے گی۔
رہنما پی ٹی آئی نے کہا کہ نفرت تب پیدا ہوتی جب آپ قوم کی آواز دبانے کی کوشش کرتے ہیں، جب عوام کے فیصلے کو نہیں مانا گیا تو ہمارا ملک بکھر گیا، ہم عوام کی آواز کو سنیں گے اور پھر فیصلے کریں گے۔
ان کا کہنا تھا کہ رانا ثنااللہ کے شہر میں بیٹھا ہوں لیکن فیصل آباد کی عوام آپ کومسترد کر چکی، اگر آپ آئین پر یقین رکھتے ہیں تو آئین کو پڑھیں ، ہمارے ملک کے فیصلے اب ہماری عوام نے کرنے ہیں۔
کابینہ نےعوام کو کچلنے کیلئے 46 کروڑ کی اضافی گرانٹ دی راناثناعوام پرگولے برسانے کی تیاری کر رہے ہیں،
تحریک انصاف رہنما نے کہا کہ جس شہر جا رہا ہوں لانگ مارچ کیلئے عوام کا جوش دیکھنے کومل رہاہے، سائفر پر تحریک انصاف کا مطالبہ ہے کہ تحقیقات کی جائیں، سپریم کورٹ کو سائفر تحقیقات کیلئے سوموٹو ایکشن لینا چاہئے۔
ارشد شریف کے حوالے سے ان کا کہنا تھا کہ ارشد شریف کو کہاں سے خطرہ تھا کون ایف آئی آر درج کرارہا تھا، جس دباؤ میں آکر ارشد شریف باہرگیا وہی اس کیس کی تحقیقات کر رہے ہیں، عدالتی احکامات کے ذریعے اس کیس کی شفاف تحقیق ہو سکتی ہے۔
لانگ مارچ سے متعلق اسد عمر نے کہا کہ لانگ مارچ میں 2 ہزار بندہ ہے تو ملک بھر سے کیوں پولیس بلائی گئی ،یہ صبح سے شام تک امپورٹڈ حکومت پریس کانفرنس کیوں کر رہے ہیں۔
پی ٹی آئی رہنما کا کہنا تھا کہ وہ شخص جو بیماری میں باہر بھاگا تھا اب وہ لندن میں شاپنگ کر رہا ہوتا ہے، جب سے 2 ہزار بندہ باہر نکلا ہے اس کے پلیٹ لیٹس کم ہونا شروع ہو گئے ، 2 ہزار بندوں کیلئے 6 ہزار اہلکار سندھ سے کیوں منگوائے ہیں۔
