لاہور : انسداد دہشت گردی لاہور کی عدالت نے پاکستان تحریک انصاف کے مرکزی رہنما اسد عمر کی حاضری معافی کی درخواست مسترد کردی۔
تفصیلات کے مطابق انسداد دہشت گردی عدالت نے لاہور میں جلاؤ گھیراؤ اور توڑپھوڑ کے مقدمہ کی سماعت کی۔
مذکورہ مقدمے میں پی ٹی آئی رہنما اسد عمر نے عدالت سے حاضری کے استثنیٰ کی درخواست کی تھی، سماعت کے بعد عدالت نے درخواست پر فیصلہ محفوظ کرلیا تھا۔
بعد ازاں عدالت نے فیصلہ سناتے ہوئے اسد عمر کی حاضری کی درخواست کو مسترد کرتے ہوئے انہیں جج کے روبرو پیشی کی ہدایت کی۔
واضح رہے کہ پی ٹی آئی رہنماؤں کے خلاف شادمان پولیس نے لاہور میں جلاؤ گھیراؤ اور توڑپھوڑ کا مقدمہ درج کیا تھا۔
اس سے قبل انسداد دہشت گردی لاہور کی عدالت میں جلاؤ گھیراؤ اور توڑ پھوڑ کے مقدمہ کی سماعت ہوئی جس میں عدالت نے پی ٹی آئی رہنما فرخ حبیب کی عبوری ضمانت مسترد کردی تھی جبکہ پی ٹی آئی کے رہنماؤں یاسمین راشد، میاں اسلم و دیگر کی عبوری ضمانت میں7مارچ تک توسیع کردی۔
