میرٹھ: بھارتی ریاست اترپردیش کے ایک اسپتال میں ڈاکٹروں نے ایک بچے کی آنت سے 28 بڑے کیڑے نکال لیے۔
بھارتی میڈیا رپورٹس کے مطابق ریاست اتر پردیش کے ضلع میرٹھ میں واقع لالا لجپت رائے میڈیکل کالج میں ایک 5 سالہ لڑکے کی بڑی آنت سے سرجنز نے کامیاب آپریشن کے ذریعے بڑے کیڑے نکال لیے۔
بچہ چند دنوں سے پیٹ میں درد، الٹی اور پیٹ پھولنے کی تکلیف میں مبتلا تھا، ڈاکٹروں نے معائنہ کیا تو معلوم ہوا کہ بچے کی آنتوں میں رکاوٹ ہے، جس کا سبب کیڑے تھے۔
سرجن ڈاکٹر سندیپ مالیان نے بچے کے والدین کو آپریشن کا مشورہ دیا، انھوں نے ڈاکٹر شیتل، ڈاکٹر ترون، ڈاکٹر وپن دھاما و دیگر ٹیم کی مدد سے ایک کامیاب آپریشن کر کے آنت سے تمام کیڑے نکال لیے۔
ڈاکٹرز نے آپریشن کی ویڈیو بھی جاری، جس میں دیکھا جا سکتا ہے کہ سرجن آنت کاٹ کر اس میں سے فورسپس کے ذریعے ایک ایک کر کے بڑے کیڑے نکال رہے ہیں۔ رپورٹس کے مطابق آپریشن کے بعد مریض پہلے سے بہتر حالت میں ہے۔
ڈاکٹر سندیپ نے بتایا کہ اس طرح کے کیڑے پیٹ میں تب پیدا ہوتے ہیں جب بچہ مٹی کھائے یا سبزیوں میں لگی گندگی پیٹ میں چلی جائے۔
