کراچی: ایئرپورٹ سکیورٹی فورس کے جناح ٹرمینل پرتعینات عملے نے فرض شناسی اور دیانت داری کی مثال قائم کردی۔
ترجمان اے ایس ایف کے مطابق ایئرپورٹ سکیورٹی فورس کے جناح ٹرمینل پرتعینات عملے نے فرض شناسی اور دیانت داری کی مثال قائم کرتے ہوئے مسافرکے گمشدہ 40 لاکھ روپے اور دیگر قیمتی سامان بشمول بیگ واپس کردیا۔
ترجمان نے بتایا کہ مسافر عبدالستار کراچی سے اسلام آباد سفر کر رہے تھے اور غلطی سے اپنا ہینڈ بیگ سرچ کاؤنٹر پر بھول گئے، تلاشی کاؤنٹر پر تعینات اے ایس ایف کی سب انسپکٹر فلک ناز کو 40,00,000/- روپے اور سیل فون پر مشتمل بیگ ملا۔
ترجمان اے ایس ایف نے بتایا کہ اے ایس ایف اہلکار نے اہل خانہ کا سراغ لگایا اور تمام قیمتی سامان کے ساتھ ہینڈ بیگ ان کے حوالے کر دیا۔
مسافر عبدالستار نے اے ایس ایف اہلکار کی ایمانداری کو سراہتے ہوئے نقد انعام دینے کی کوشش کی تاہم اس نے شائستگی سے انکار کردیا۔
اے ایس ایف ترجمان کا کہنا ہے کہ بعد ازاں مسافر عبدالستار اور ان کے اہل خانہ نے اے ایس ایف کے عملے کی ایمانداری کو سراہتے ہوئے ان کا شکریہ ادا کیا، مسافر عبدالستار نے سب انسپکٹر فلک ناز کے لیے تعریفی نوٹ بھی چھوڑا۔
ترجمان اے ایس ایف کا بتانا ڈی جی اے ایس ایف نے سب انسپکٹر فلک ناز کو اس کی ایمانداری اور دیانت داری کے اعتراف میں تعریفی سند کے ساتھ ساتھ نقد انعام سے نوازا۔
