میرے ایک استاد اونگارتی تھے۔ میں نے ان سے پوچھا کہ سَر "ایمان کیا ہوتا ہے؟” انہوں نے جواب دیا کہ ایمان خدا کے کہے پر عمل کرتے جانے اور کوئی سوال نہ کرنے کا نام ہے۔ یہ ایمان کی ایک ایسی تعریف تھی جو دل کو لگتی تھی۔
اٹلی میں ایک بار ہمارے ہوٹل میں آگ لگ گئی اور ایک بچہ تیسری منزل پر رہ گیا۔
شعلے بڑے خوفناک قسم کے تھے۔ اس بچے کا باپ نیچے زمین پر کھڑا بڑا بے قرار اور پریشان تھا۔ اس لڑکے کو کھڑکی میں دیکھ کر اس کے باپ نے کہا چھلانگ مار بیٹا۔ "اس لڑکے نے کہا کہ "بابا کیسے چھلانگ ماروں، مجھے تو تم نظر ہی نہیں آ رہے (اب وہاں روشنی اس کی آنکھوں کو چندھیا رہی تھی)۔
اس کے باپ نے کہا کہ تو چاہے جہاں بھی چھلانگ مار، تیرا باپ نیچے ہے، تو مجھے نہیں دیکھ رہا میں تو تجھے دیکھ رہا ہوں نا۔
اسی طرح اللہ تعالیٰ فرماتے ہیں کہ "تم مجھے نہیں دیکھ رہے، میں تو تمہیں دیکھ رہا ہوں۔”
اعتماد کی دنیا میں اترنے کے لیے ضروری ہے کہ ہم اپنی شہ رگ کی بیٹھک اور شہ رگ کے ڈرائنگ روم کا کسی نہ کسی طرح آہستگی سے دروازہ کھولیں۔ اس کی چٹخنی اتاریں اور اس شہ رگ کی بیٹھک میں داخل ہو جائیں جہاں اللہ پہلے سے موجود ہے۔
(از قلم اشفاق احمد، کتاب زاویہ 3)
