مری: سیرو تفریح کیلئے مری جانیوالے اسلام آباد کے اے ایس آئی خاندان سمیت جاں بحق ہوگئے ، اے ایس آئی نویداقبال تھانہ کوہسارمیں تعینات تھے۔
تفصیلات کے مطابق شدید برفباری کے باعث مری میں پیش آنے سانحے میں اے ایس آئی نوید اقبال خاندان سمیت جاں بحق ہوگئے ، اےایس آئی نویداقبال اپنے بچوں،ہمشیرہ، بھانجوں کے ہمراہ سفرکر رہے تھے۔
جاں بحق افراد میں اے ایس آئی نویداقبال اور ان کی ہمشیرہ ، 18سالہ بیٹی شفق، 14سالہ دعا،10سالہ اقرا،5سالہ احمد ، 2سالہ بھانجا اور 9سالہ بھتیجا شامل ہیں۔
پولیس کا کہنا ہے کہ مری میں جاں بحق فیملی اسلام آبادپولیس آفیسرکی تھی، اے ایس آئی نوید اقبال تھانہ کوہسارمیں تعینات تھے۔
اس سانحے کے بعد اے ایس پی کوہسار،ایس ایچ او لواحقین کے گھرمیں موجود ہیں ، آئی جی اسلام آباد محمد احسن یونس کا کہنا ہے کہ پولیس کڑے وقت میں لواحقین کے ساتھ کھڑی ہے، مرحوم اےایس آئی کےلواحقین سےتعاون کیا جائے گا۔
اسلام آبادپولیس راولپنڈی انتطامیہ کےساتھ رابطےمیں ہے، پولیس کی ایمبولینسں مرحوم اے ایس آئی اور فیملی کی میتیں لینے مری روانہ کردی گئیں ہیں ، ٹیم کے ہمراہ تین ایمبولینسز بھجوائی گئی ہیں۔
اسلام آباد لانے کے بعد میتوں کوآبائی علاقے چکوال منتقل کیا جائے گا۔
