ایشیا میں کرکٹ کا نیا سلطان کون ہوگا؟ فائنل معرکہ آج دبئی میں ہوگا۔
دبئی کے انٹرنیشنل کرکٹ اسٹیڈیم میں آج پاکستان اور سری لنکا مد مقابل ہوں گے، شاہینوں نے سپر فور میں شکست کا بدلہ لینے کے لیے پر تول لیے ہیں، جب کہ آئی لینڈرز بھی فتوحات کا سلسلہ جاری رکھنے کے لیے بے قرار دکھائی دے رہے ہیں۔
ایشین کرکٹ پر بادشاہت شاہینوں سے صرف ایک جیت دوری پر ہے، سری لنکا کو ہرا کر پاکستان ٹیم تیسری بار ایشیا کپ کی ٹرافی اٹھائیں گے۔ قومی کپتان بابر اعظم جیت کے لیے پر امید ہیں، کہتے ہیں ہمارے پاس بہترین کمبی نیشن ہے، فائنل میں ٹکر کا مقابلہ ہوگا۔
دوسری جانب سری لنکا ٹیم بھی اب انڈر ڈوگ نہیں رہی، خطرناک بن گئی ہے، گرین شرٹس کو ہرا کر لگاتار چوتھی جیت حاصل کر چکی ہے۔ ادھر پاکستان بولرز کی انجری، بابر اعظم اور فخر زمان کی خراب فارم کے باوجود ٹیم لڑتے لڑتے فائنل میں پہنچی ہے۔
ایشیا کپ فائنل سے قبل اہم قومی کھلاڑی فٹ ہوگئے
بہترین اسپنر کی وجہ سے بولنگ تو مضبوط تھی ہی، سری لنکا کے بلے باز بھی اب فارم میں آ گئے ہیں، مینڈس، نیسانکا، راجا پاکسا اور کپتان شناکا پاکستانی بولرز کے لیے بڑا خطرہ بن سکتے ہیں۔
پاکستانی بیٹنگ کا انحصار سب سے زیادہ رضوان پر ہے، بابر لگا تار 5 میچ میں ناکام ہوئے ہیں، لیکن فائنل میں انھیں پرفارم کرنا ہوگا۔
ٹی 20 مقابلوں میں دونوں ٹیمیں 22 بار ٹکرائی ہیں، 13 پاکستان نے جیتے، جب کہ 9 سری لنکا کے نام رہے، آج شاہین جیت کا عزم لے کر میدان میں اتریں گے، اور 2014 ایشیا کپ فائنل کی ہار کا بدلہ چکائیں گے۔
