ایشیا کپ میں سری لنکا کے خلاف افغانستان کی سنسنی خیز مقابلے کے بعد شکست نے نیا تنازع کھڑا کردیا۔
افغانستان کو سپر فور مرحلے میں کوالیفائی کرنے کے لیے دی جانے والی ہدف کی کیلکولیشن پر کوچ جوناتھن ٹروٹ پھٹ پڑے۔
ہیڈ کوچ افغانستان کرکٹ ٹیم جوناتھن ٹروٹ نے قذافی اسٹیڈیم میں میچ کے بعد پریس کانفرنس کرتے ہوئے کہا کہ ہمیں 37.1 اوورز کے علاوہ کوئی اور کیلکولیشن نہیں بتائی گئی تھی۔
انکا کہنا تھا کہ معلوم نہیں تھا کہ چھکا مار کر 38 اوور میں کھیل مکمل کرسکتے تھے۔
جوناتھن ٹروٹ نے کہا کہ ہم ٹورنامنٹ میں بہتر پرفارم کرسکتے تھے۔ ٹورنامنٹ سے باہر ہونے پر مایوسی ہوئی ہے۔
افغانستان کرکٹ ٹیم کے ہیڈ کوچ کا کہنا تھا کہ ہمیں اپنی غلطیوں پر قابو پانا ہوگا۔
واضح رہے کہ ایشیا کپ گروپ بی کے تیسرے اور پہلے مرحلے کے چھٹے میچ میں سری لنکا نے افغانستان کو سنسنی خیز مقابلے کے بعد 2 رنز سے شکست دے کر سپر فور مرحلے کےلیے کوالیفائی کرلیا۔
