ایشیا کپ کے گروپ میچ میں بنگال ٹائیگرز نے افغانستان کو 89 رنز سے شکست دے دی، افغان بیٹرز بڑے ہدف کو دیکھ کر جلد ہمت ہار بیٹھے۔
بنگلہ دیش نے پہلے کھیلتے ہوئے افغان بولرز کی ایک نہ چلنے دی اور 5 وکٹیں کھو کر 335 رنز کا پہاڑ کھڑا کردیا۔ مہدی حسن اور نجم الحسین شنٹو نے شاندار کھیل کا مظاہرہ کرتے ہوئے سنچریاں اسکور کیں۔ راشدخان سمیت کوئی بھی بولر حریف بلے بازوں کو قابو کرنے میں ناکام رہا۔
مہدی حسن نے 119 گیندوں پر112 رنز بنائے جب کہ نجم الحسین نے 104رنز بنانے کے لیے 105 گیندوں کا سہارا لیا، افغانستان کے مجیب الرحمان اور گلبدین نائب نے 1،1 وکٹ حاصل کی۔
افغانستان بیٹرز ہدف کے تعاقب میں شروع سے ہی جدوجہد کرتے نظر آئے، ایک رن پر اوپنر رحمان اللہ گرباز پویلین چلتے بنے، ابراہیم زادران اور رحمت شاہ نے اننگز کو آگے بڑھانے کی کوشش کی اور 78 رنز کی شراکت قائم کی۔
رحمت شاہ 33 رنز بناکرتسکین کی گیند پر بولڈ ہوئے، 2 وکٹیں گرنے کے بعد ابراہیم زادران اورحشمت اللہ نے نصف سنچریاں اسکور کیں، دونوں نے بالترتیب 75 اور 51 رنز بنائے۔
آخر میں راشد خان نے 24 رنز بنا کر کچھ مزاحمت کی تاہم وہ بھی تسکین کا شکار ہوگئے۔ بنگلہ دیش کی جانب سے تسکین احمد نے 4 جب کہ شریف السلام نے 3 کھلاڑیوں کو آؤٹ کیا۔
اس سے قبل افغانستان اور بنگلادیش کے درمیان ہونے والے میچ کے انتظامات کا جائزہ لینے کے لیے ڈی سی لاہور نے قذافی اسٹیڈیم اور کنٹرول روم کا دورہ کیا۔
ڈی سی لاہور کا کہنا تھا کہ متعلقہ ادارے فول پروف سیکیورٹی کو یقینی بنا رہے ہیں، شائقین کے لیے پارکنگ کے بہترین انتظامات کیے گئے ہیں۔
