ایشیا کپ رواں سال دفاعی چیمپئن بھارت میں کھیلا جانا تھا تاہم اب اطلاعات ہیں کہ اے سی سی کا یہ ایونٹ نیوٹرل وینیو پر کھیلا جائے گا۔
ایشیا کپ رواں سال دفاعی چیمپئن بھارت میں شیڈول ہے اور آئندہ برس ٹی 20 ورلڈ کپ کو مدنظر رکھتے ہوئے یہ ایونٹ بھی ٹی 20 فارمیٹ میں کھیلا جانا ہے۔
تاہم کرکٹ ویب سائٹ کے مطابق اب بھارت میں ایشیا کپ 2025 کا انعقاد کھٹائی میں پڑتا دکھائی دے رہا ہے۔ روایتی حریفوں پاکستان اور بھارت کے درمیان کشیدہ تعلقات کی وجہ سے ایشین کرکٹ کونسل (اے سی سی) ٹورنامنٹ کے لیے کسی نیوٹرل وینیو کی تلاش میں ہے۔
بتایا جا رہا ہے کہ اے سی سی ایونٹ کے لیے سری لنکا اور متحدہ عرب امارات کے بارے میں سوچ رہے ہیں تاہم ممکنہ طور پر یو اے ای انتخاب ہو سکتا ہے۔ تاہم اس کی میزبان بدستور بھارت کے پاس ہی رہے گی۔
رپورٹ کے مطابق ایشین کرکٹ کونسل نے یہ اہم فیصلہ پاکستان کی میزبانی میں کھیلی جا رہی آئی سی سی چیمپئنز ٹرافی میں پیدا ہونے والے تنازع کو دیکھ کر کیا ہے کیونکہ بھارت نے اس میگا ایونٹ کے لیے پاکستان آنے سے انکار کر دیا تھا اور ایک معاہدے کے تحت وہ اپنے میچز دبئی میں کھیل رہا ہے۔
اس معاہدے کے مطابق 2027 تک بھارت میں ہونے والے کسی ایونٹ میں پاکستان ٹیم بھارت نہیں جائے گی بلکہ اپنے تمام میچز نیوٹرل مقام پر کھیلے گی۔
ایشیا کپ کا تاحال باضابطہ شیڈول جاری نہیں کیا گیا ہے تاہم یہ رواں سال 2025 میں ہی کھیلا جائے گا۔ 2 ہفتوں تک جاری رہنے والے اس ٹورنامنٹ میں مجموعی طور پر 19 میچز کھیلے جائیں گے۔
ایشیا کپ 2025 میں پاکستان اور بھارت سمیت 8 ٹیمیں سری لنکا، افغانستان، بنگلہ دیش، عمان، یو اے ای اور نیپال شریک ہوں گی۔
واضح رہے بھارتی حکومت نے بھارتی ٹیم کو پاکستان آکر چیمپئنز ٹرافی کھیلنے کی اجازت نہیں دی تھی جس کے بعد پاکستان نے بھی بھارت میں رکھے گئے میچز کسی نیوٹرل جگہ پر منعقد کرانے کی شرط رکھی تھی۔
