پاکستان کرکٹ بورڈ نے کرپشن چارجز پر اسپنر آصف آفریدی پر دو سال کی پابندی عائد کردی ہے۔
پاکستان کرکٹ بورڈ کی جانب سے جاری اعلامیے کے مطابق 36 سالہ اسپنر نے کرپشن چارجز میں جرم کا اعتراف کرلیا ہے جبکہ ان کی سزا کا آغاز 12 ستمبر 2022 کو ہوا تھا۔
آصف آفریدی نے پاکستان سپر لیگ میں شاندار بولنگ کی تھی، انہوں نے ملتان سلطانز کے لیے پانچ میچز میں 6.52 کی اکنامی ریٹ سے 8 وکٹیں حاصل کی تھیں۔
آرٹیکل 2.4.10 کی خلاف ورزی پر آفریدی کو دو سال کی نااہلی کی سزا دی گئی تھی، جبکہ آرٹیکل 2.4.4 کی خلاف ورزی پر ان پر چھ ماہ کی پابندی عائد کی گئی تھی۔
نااہلی کی دونوں مدتیں ایک ساتھ چلیں گی اور ان کی عارضی معطلی کے دن سے شروع ہوں گی، جس کا آغاز 12 ستمبر 2022 کو ہوا تھا۔
پی سی بی نے پابندی کی مدت کے بارے میں اپنے عزم پر پہنچتے ہوئے اعتراف جرم، اظہارِ پشیمانی، ماضی کا ٹریک ریکارڈ اور آصف آفریدی کی درخواست پر غور کیا کہ پی سی بی ان کے کیس پر ہمدردی سے غور کرے، یہ دعویٰ کرتے ہوئے کہ اس نے غیرارادی طور پر کوڈ کی خلاف ورزی کی۔
