دبئی: قومی کرکٹ ٹیم کے بلے باز آصف علی نے بتایا ہے کہ گزشتہ روز شاداب خان نے سنگل لینے کا اصرار کیا مگر میں نے رن نہیں لیا۔
افغانستان کے خلاف شاندار کارکردگی دکھا کر قومی ٹیم کو فتح سے ہمکنار کروانے والے بلے باز آصف علی نے ویڈیو پیغام جاری کیا ہے۔
اپنے ویڈیو پیغام میں انہوں نے خود کو خوش قسمت قرار دیتے ہوئے کہا کہ میری وجہ سے پاکستانیوں کو خوشی ملی۔
انہوں نے کہا کہ یہ ہی سوچ رہا تھا کہ جو گیند ملے گا اسے مڈل کروں گا، شاداب خان کے اصرار کے باوجود سنگل نہیں لیا۔
مزید پڑھیں: اسٹیڈیم کے بعد سوشل میڈیا پر آصف علی کا چرچا، ہر سو مبارک باد کے پیغامات
آصف علی نے کہا کہ ’میں جانتا تھا کہ اگر اس اوور میں موقع نہ ملا تو اگلے اوور میں میچ ختم کرسکتا ہوں، مگر بالز کو ہٹ کرنے کی کوشش کی جس میں کامیاب رہا‘۔
انہوں نے مداحوں سے اسی طرح سپورٹ کرنے کی اپیل کرتے ہوئے کہا کہ ٹیم کا ماحول بہت خوشگوار ہے، ہم اگلے میچز میں بھی کامیابی کے تسلسل کو برقرار رکھیں گے۔
یاد رہے کہ ایک روز قبل آصف علی نے 19ویں اوور میں لگاتار چار چھکے مار کر میچ کا پانسہ پلٹا اور قومی ٹیم کو فتح سے ہمکنار کروایا۔ انہوں نے 7 گیندوں کا سامنا کرتے ہوئے 25 رنز کی ناقابلِ شکست اننگز کھیلی تھی، جس میں چار چھکے بھی شامل تھے۔
