کراچی : ڈیفنس میں تاجر آصف بلوانی کے قتل کا کیس حل کرلیا گیا، پولیس نے قتل میں ملوث مرکزی ملزم کو مقابلے کے بعد گرفتار کرلیا۔
اس حوالے سے ایس پی انویسٹی گیشن ساؤتھ عبدالرحیم شیرازی نے بتایا کہ تاجر آصف بلوانی کو قتل کرنے والا ملزم کو زخمی حالت میں گرفتار کیا گیا ہے۔
انہوں نے بتایا کہ خیابان ساحل کے قریب سے ملزم کو زخمی حالت میں پکڑا گیا، ملزم سے اسلحہ اور موٹر سائیکل برآمد کی گئی ہے، ملزم بینک ڈکیتیوں میں بھی ملوث ہے۔
واضح رہے کہ 04 جون 2024 کو کراچی کے علاقے ڈیفنس فیز 2 میں نامعلوم افراد نے فائرنگ کرکے فلور مل کے تاجر آصف بلوانی کو قتل کردیا تھا۔
پولیس کے مطابق آصف بلوانی کو ڈکیتی مزاحمت پر قتل کیا گیا، وہ بینک سے دس لاکھ روپے نکال کر گھر کی طرف جارہے تھے کہ ملزمان سے بچنے کے لئے کار تیز چلائی تو ان کی کار کے الیکٹرک کے کھمبے سے ٹکرا گئی تھی۔
