کراچی : سابق صدر آصف علی زرداری نے نئے سال کی آمد پر قوم کے نام مبارکباد کے پیغام میں کہا ہے کہ یقین ہے کہ آنے والا سال ملک کی ترقی اور قوم کی خوشحالی کا سال ہوگا۔
انہوں نے کہا کہ ہمارے ملک کی عوام نے بڑے دکھ جھیلے ہیں، کورونا وائرس نے نہ صرف ملکی معیشت کو بے تحاشا نقصان پہنچایا بلکہ معیشت کے ساتھ ساتھ خارجہ امور کو بھی تباہ کردیا۔
آصف علی زرداری کا کہنا تھا کہ پیپلزپارٹی نے دہشت گردوں کا صفایا کرکے سوات میں دوبارہ قومی پرچم سربلند کیا تھا، انتہائی تکلیف دہ بات ہے کہ خیبرپختونخوا اور بلوچستان میں ایک بار پھر دہشت گرد ی ہورہی ہے۔
انہوں نے کہا کہ دہشت گرد ہمارے بچوں، سیکیورٹی فورسز کے افسروں اور جوانوں کو شہید کررہے ہیں، بینظیر بھٹو شہید کا فلسفہ سچ ثابت ہوا کہ دہشت گردی کا خاتمہ صرف جمہوریت ہی کر سکتی ہے۔
یہ ہمارا وعدہ ہے کہ دہشت گردوں کا صفایا کرکے اپنی دھرتی کو امن کا گہوارہ بنائیں گے، آنے والے نسلوں کو ہرطرح کے خوف سے پاک معاشرہ دینگے۔
موسمیاتی تبدیلی کی وجہ سے سندھ میں کئی ہفتوں تک آسمان پانی برساتا رہا، بارش نے سیلاب کا رخ اختیار کرکے پورے سندھ کو دریامیں تبدیل کر دیا تھا،سیلاب متاثرین کے چہروں پرمسکراہٹ ہمارا مشن ہے۔
بلاول بھٹو نے مختصر مدت میں دنیا میں پاکستان کی ساکھ قائم کی ہے، پوری دنیا بلاول بھٹو زرداری کی بات بھی سن رہی ہے اور ان کے موقف کی تائید بھی کر رہی جو پاکستان کی تاریخی کامیابی ہے۔
اپنی دعاؤں میں سیلاب کے متاثرین اور مظلوم کشمیریوں کی آزادی کو یاد رکھا جائے، یقین ہے کہ 2023 ملک اور قوم کی ترقی اور خوشحالی کا سال ہوگا۔
