ان دنوں پاکستانیوں کی بڑی تعداد کیلئے وقت پر پاسپورٹ کا حصول کافی حد تک دشوار بلکہ ذہنی اذیت کا باعث بن رہا ہے جس کی بڑی وجہ پاسپورٹس کی بروقت چھپائی کا نہ ہونا ہے۔
پاسپورٹ کی دستیابی میں تاخیر کی شکایات ارجنٹ اور فاسٹ ٹریک دونوں کیٹیگریز میں سامنے آرہی ہیں جس کا اظہار شہریوں کی جانب سے مختلف سوشل میڈیا پلیٹ فارمز پر کیا جارہا ہے۔
عوام کو پاسپورٹ کی ڈلیوری میں تاخیر سے متعلق متعلقہ حکام نے نوٹس لیا اور وزرات خزانہ نے پاسپورٹ کا موجودہ بیک لاگ ختم کرنے کے لیے فنڈز جاری کردیے ہیں۔
اس حوالے سے ذرائع کا کہنا ہے کہ اس وقت 8 لاکھ سے زیادہ پاسپورٹ کی پرنٹنگ التواء کا شکار ہے، تاہم پاسپورٹ مشینری اور لیمینیشن پیپر کی خریداری مکمل ہوتے ہی یہ بیک لاگ ختم ہوجائے گا۔
پاسپورٹ اینڈ امیگریشن حکام کے مطابق یومیہ 20 سے 25 ہزار پاسپورٹ کی پرنٹنگ کی جارہی ہے جب کہ یومیہ بنیادوں پرپاسپورٹ اجراء کی 40 سے45 ہزار درخواستیں موصول ہورہی ہیں۔
علاوہ ازیں ذرائع کا مزید کہنا ہے کہ پرنٹنگ مشینز اور ای پاسپورٹ مشینز کی خریداری کے ٹینڈرز کا انٹرنیشنل اشتہار دے دیا گیا ہے جب کہ چھپائی میں استعمال ہونے والے لیمینیشن پیپرز کے ٹینڈرز کا بھی انٹرنیشنل اشتہار جاری ہے۔
