کراچی : سابق صدر آصف زرداری کو طبیعت ناساز ہونے پر اسپتال منتقل کردیا گیاہے ، والدکی علالت کے پیش نظربلاول بھٹو اسلام آباد سے اور بختاور دبئی سے کراچی پہنچ گئے۔
تفصیلات کے مطابق سابق صدر آصف علی زرداری کی طبیعت ناساز ہوگئی، جس کے بعد ڈاکٹرز کی ہدایت پر انھیں اسپتال میں داخل کرادیا گیا ہے ، والد کی علالت کے پیش نظربلاول بھٹو اسلام آباد سے اور بختاور دبئی سے کراچی پہنچ گئیں ہیں۔
یاد رہے رواں سال جنوری میں بھی سابق صدر آصف علی زرداری کو طبیعت خراب ہونے پر نجی اسپتال میں داخل کرایا گیا تھا ، آصف زرداری کو تیزبخار تھا
جبکہ ان کا شوگر لیول انتہائی کم ہوگیا تھا۔
خیال رہے سابق صدر آصف علی زرداری کو دل، کمر درد اورشوگرکا مرض لاحق ہے۔
واضح رہے 4 روز قبل آصف زرداری نے بجٹ اجلاس میں شرکت کی تھی ، جہاں انہوں نے صحافیوں سے غیر رسمی بات چیت کرتے ہوئے کہا تھا کہ مانگے تانگے پر چلنے والی حکومت کہیں ہے نہیں، اگر حکومت کہیں ہو تو وہ گرے گی۔
سابق صدر نے افغانستان کی صورتحال کو خطرناک قرار دیتے ہوئے کہا کہ افغان صورتحال کے اثرات پاکستان پر آسکتے ہیں، افغانستان معاملے پر نظر رکھنےکیساتھ سوچ و بچار بھی کرنا ہے
