اسلام آباد: پاکستان پیپلزپارٹی کے شریک چیئرمین آصف علی زرداری نے کہا ہے کہ اعتزاز احسن صدر کے لیے اپوزیشن کے متفقہ امیدوار ہوں گے، اعتزاز احسن جیسا قابل رہنما ہی پاکستان کا صدر ہونا چاہئے۔
ان خیالات کا اظہار انہوں نے اعتزاز احسن، قمر زمان کائرہ، چوہدری منظور سے ملاقات کے دوران کیا، ملاقات میں صدارتی انتخابات سے متعلق پارٹی پالیسی پر تبادلہ خیال کیا گیا۔
سابق صدر آصف علی زرداری نے کہا کہ اعتزاز احسن صدر کے لیے اپوزیشن کے متفقہ امیدوار ہوں گے، دوسری جماعتوں سے اعتزاز احسن کے لیے حمایت لیں گے۔
آصف زرداری نے کہا کہ وزیر اعظم کے انتخاب میں پیپلزپارٹی نے اپنی حکمت عملی اختیار کی، شہباز شریف کو اپوزیشن لیڈر تسلیم کرتے ہیں، اعتزاز احسن جیسا قابل رہنما ہی ملک کا صدر بننا چاہئے۔
مزید پڑھیں: پیپلزپارٹی نے اعتزاز احسن کو صدارتی امیدوار نامزد کردیا
واضح رہے کہ پی پی کے چیئرمین اور آصف زرداری نے اعتزاز احسن کو صدارتی امیدوار نامزد کرنے کی منظوری دی جبکہ خورشید شاہ، شیری رحمان اور قمر زمان کائرہ کو مسلم لیگ ن سمیت دیگر اتحادی جماعتوں سے رابطے کرنے کا ٹاسک دے دیا۔
ذرائع کا کہنا ہے کہ پیپلزپارٹی کے رہنما جلد سیاسی رہنماؤں سے ملاقاتیں کر کے اپنے امیدوار کی حمایت مانگیں گے۔ یاد رہے کہ تحریک انصاف نے صدراتی انتخاب کے لیے ڈاکٹر عارف علوی کو اپنا امیدوار نامزد کیا ہے۔
خیال رہے کہ صدر مملکت ممنون حسین کے عہدے کی مدت 8 ستمبر 2018 کو پوری ہورہی ہے، اُس سے قبل نئے صدر کے انتخاب کے لیے 4 ستمبر کو پولنگ کا انعقاد کیا جائے گا۔
