کراچی: پاکستان پیپلز پارٹی کی رہنما نفیسہ شاہ نے کہا ہے کہ آصف زرداری نے جیلیں کاٹی ہیں، وہ ماضی کی طرح آگے بھی مقدمات کا سامنا کریں گے۔
ان خیالات کا اظہار انہوں نے اے آر وائی نیوز کے پروگرام ’الیونتھ آور‘ میں انٹرویو دیتے ہوئے کیا، نفیسہ شاہ کا کہنا تھا کہ ایف آئی آر میں براہ راست آصف زرداری اور فریال تالپور کا نام نہیں، اس کے باجود انہیں اشتہاری قرار دیا گیا۔
انہوں نے کہا کہ آصف زرداری جب سے سیاست میں آئے ان کے خلاف کیسز ہیں،انہوں نے 11 سال جیل کاٹی اور مقدمات کا سامنا کیا، اور عدالتوں نے آصف زرداری کو مقدمات سے بری کیا۔
رہنما پی پی کا کہنا تھا کہ پیپلز پارٹی کے خلاف ماضی میں بھی سازشیں ہوئی ہیں، آصف زرداری نے حالات کا سامنا کیا، اور جیلیں کاٹیں۔
پاکستان تحریک انصاف سے متعلق تبصرہ کرتے ہوئے نفیسہ شاہ کا کہنا تھا کہ حکومت تو ابھی سے اپوزیشن سے ڈر گئی ہے، ہم تو چاہیں گے حکومت اپنی مدت پوری کرے۔
فریال تالپور نے ایف آئی اے کا چالان چیلنج کردیا
خیال رہے کہ وفاقی تحیقاتی ادارہ (ایف آئی اے) میں آصف زرداری اور ان کی ہمشیرہ فریال تالپور کو منی لانڈرنگ کیس سے متعلق تحیقات کا سامنا ہے۔
یاد رہے کہ گذشتہ ہفتے سابق صدر مملکت آصف علی زرداری کی بہن فریال تالپور نے منی لانڈرنگ کے مقدمے میں ایف آئی اے کا عبوری چالان سندھ ہائیکورٹ میں چیلنج کیا تھا۔
فریال تالپور کے وکیل نے مؤقف اختیار کیا تھا کہ ایف آئی اے کی ایف آئی آر میں منی لانڈرنگ کا ذکر نہیں، چالان میں فریال تالپور کا کوئی کردار واضح نہیں جبکہ الزامات سے ان کا کوئی تعلق نہیں ہے۔