بھارتی ریاست آسام کے وزیراعلیٰ نے کہا ہے کہ پہلگام واقعے پر کوئی بھی سوال اٹھائے گا تو اسے گرفتار کرلیا جائیگا۔
وزیراعلیٰ آسام ڈاکٹر ہمانتا بسوا سرما نے ہندو انتہاپسند ذہینت آشکار کرتے ہوئے پہلگام فالس فلیگ آپریشن پر سوال اٹھانے والوں کو گرفتاری کی دھمکی دی ہے، ہمانتا بسوا سرما نے کہا کہ پہلگام میں ہونے والے حملے پر سوال اٹھانے والوں کو گرفتار کریں گے۔
الجزیرہ ٹی وی نے اس حوالے سے بتایا کہ آسام میں سیکیورٹی ناکامی کا سوال اٹھانے والے 10 افراد کو اب تک گرفتار کیا جاچکا ہے۔
بھارتی حکومت نے مقبوضہ کشمیر میں مظالم کو چھپانے کی کوشش کرتے ہوئےپہلگام حملے کے بعد مقبوضہ کشمیر میں نام نہاد سیکیورٹی آپریشنز کی کوریج پر پابندی لگادی ہے۔
الجزیرہ ٹی وی نے بتایا کہ بھارتی حکومت چھاپوں میں اب تک کشمیریوں کے 75 گھر تباہ کرچکی ہے، بھارتی پولیس نے 175 سے زائد مزید کشمیریوں کو حراست میں لےلیا ہے، بھارتی فوج اور پولیس نے سیکیورٹی آپریشن کے نام پر ظلم کا بازار گرم کررکھا ہے۔
دوسری طرف مقبوضہ کشمیر کی وزیرصحت نے بھارتی گورنر پنجاب سے رابطہ کیا ہے اور کشمیریوں کی حفاظت کا مطالبہ کیا ہے۔
وزیرصحت مقبوضہ کشمیر کا کہنا تھا کہ بھارت بھر میں کشمیری طلبہ اور کشمیریوں کی حفاظت کو یقینی بنایا جائے۔
پہلگام حملے کے بعد الجزیرہ ٹی وی نے بتایا کہ بھارت میں مقیم کشمیریوں کو انتقامی کارروائیوں کا سامنا ہے، انھیں تشدد کا نشانہ بنایا جارہا ہے۔
ٹی آر ایف نے پہلگام واقعے میں ملوث ہونیکی تردید کردی، بھارتی بیان جھوٹ کا پلندہ ہے
