کابل: افغانستان کے صوبے کابل میں نجی ٹی وی اسٹیشن کی بس میں دھماکا ہوا جس کے نتیجے میں 2 افراد ہلاک ہوگئے۔
تفصیلات کے مطابق افغانستان کے صوبے کابل کے علاقے تیمانی میں نجی ٹی وی اسٹیشن کی بس میں دھماکے کے نتیجے میں 2 افراد ہلاک اور 5 زخمی ہوئے۔
رپورٹ کے مطابق دھماکے میں ہلاک و زخمیوں کو اسپتال منتقل کیا گیا جہاں زخمیوں کو طبی امداد فراہم کی جارہی ہے۔
وزارت داخلہ کے ترجمان نصرت رحیمی کے مطابق دھماکا خیز مواد بس میں نصب کیا گیا تھا بس کو شام ساڑھے پانچ بجے کے قریب نشانہ بنایا گیا۔
انہوں نے کہا کہ بس نجی ٹی وی ملازمین کو لے کر جارہی تھی جب اسے نشانہ بنایا گیا، کسی تنظیم کی جانب سے حملے کی ذمہ داری قبول نہیں کی گئی ہے۔
مزید پڑھیں: افغانستان، طالبان کا پولیس چیک پوسٹ پر حملہ، 10 اہلکار ہلاک
نجی ٹی وی کے ایک ملازم ذبیح اللہ کا کہنا ہے کہ حملے میں تین افراد زخمی ہوئے جن میں ایک صحافی بھی شامل ہے۔
ذبیح اللہ کا کہنا تھا کہ سیکیورٹی فورسز کی جانب سے ہمیں آگاہ کیا گیا تھا کہ طالبان ہم پر حملہ کرسکتے ہیں۔
رپورٹ کے مطابق دو ماہ قبل طالبان کی جانب سے ٹی وی چینل پر طالبان کے خلاف تشہیری مہم چلانے پر دھمکی دی گئی تھی۔
یاد رہے کہ گزشتہ سال افغانستان میں 15 میڈیا ورکرز کو قتل کردیا گیا تھا۔
خیال رہے کہ گزشتہ روز افغانستان کے وسطی صوبے دائکنڈی میں پولیس چیک پوسٹ پر طالبان کے حملے کے نتیجے میں 10 پولیس اہلکار ہلاک ہوگئے تھے۔
