لندن: مڈل سکس کاؤنٹی کےاسپتال میں چاقو بردار شخص نے خوفناک حملہ کیا ہے۔

برطانوی میڈیا کے مطابق چاقو زنی کے واقعے میں 2 افراد زخمی ہوئے ہیں جس میں ایک کی حالت تشویشناک ہے اور ڈاکٹرز اس کی جان بچانے کی کوشش کر رہے ہیں۔

پولیس نےحملہ آور کو زخمی حالت میں گرفتار کر کے نامعلوم مقام پر منتقل کر دیا ہے۔

افسران اس وقت جائے وقوعہ پر موجود ہیں اور شمال مغربی لندن کے ایکٹن لین کے اسپتال میں پولیس کی بھاری نفری تعینات ہے۔

پولیس نے بتایا کہ دو افراد کو چاقو کے وار سے زخمی حالت میں پایا گیا اور ایک اپنی زندگی کی جنگ لڑ رہا ہے۔ دوسرے زخمی کے بارے میں کہا جا رہا ہے کہ اس کی ‘جان کو خطرہ نہیں’ ہے۔

پولیس کا کہنا ہے کہ مشتبہ شخص کو جان لیوا چوٹیں بھی آئی ہیں جس کے بارے میں خیال کیا جاتا ہے کہ اس نے خود کو مارا ہے۔

Comments