کراچی: سینٹرل جیل میں قائم سنگین نوعیت کے مقدمات کی سماعت کرنے والی عدالت اے ٹی سی نے دہشت گردوں کے ممکنہ حملوں کے پیش نظر محکمہ داخلہ سے سیکیورٹی مانگ لی۔
تفصیلات کے مطابق سینٹرل جیل میں قائم سنگین نوعیت کےمقدمات کی سماعت کرنےوالی عدالت کوسیکیورٹی خدشات کا سامنا ہے، جس کے بعد جیل میں قائم اےٹی سی 6 نےسیکیورٹی کیلئےمحکمہ داخلہ کوخط لکھ دیا۔
اے ٹی سی کی جانب سے محکمہ داخلہ کو لکھے گئے خط میں کہا گیا ہے کہ ’’ اے ٹی سی 6میں دہشت گردی کے اہم مقدمات زیر سماعت ہیں، جن میں اہم ملزمان نامزد ہیں۔
خط میں مزید کہا گیا ہے کہ عزیر بلوچ، شاہد حامد قتل کیس، عباس ٹاؤن بم دھماکے، سانحہ صفورا میں سزائے موت پانے والے سعد عزیز، طاہر منہاس کے مقدمات زیر سماعت ہیں علاوہ ازیں نائن زیر سے گرفتار ملزمان کے خلاف 52 مقدمات جاری ہیں جبکہ قتل اور دیگر بم دھماکوں کے مقدمات بھی زیر سماعت ہیں۔
