لاہور: گردوں کی پیوندکاری کے لیے درکار اہم ادویات کراچی کسٹم حکام کی تحویل میں بینک کی جانب سے ایل سی کھلنے کے منتظر ہیں، دوسری جانب لاہور میں پیوندکاری بند ہو چکی ہے۔
تفصیلات کے مطابق پاکستان کڈنی ایند لیور انسٹیٹیوٹ کے ترجمان کا کہنا ہے کہ پاکستان کڈنی اینڈ لیور انسٹیٹیوٹ میں ادویات کی قلت کے باعث کڈنی ٹرانسپلانٹ بند ہیں۔
ترجمان کے مطابق وفاقی حکومت کی پالیسیوں کے باعث ایل سی نہ کھلنے پر اسپتال کو ادویات کی قلت کا سامنا ہے، ادویات کی عدم دستیابی کی وجہ سے ٹرانسپلانٹ روکے گئے ہیں۔
انھوں نے کہا ادویات کراچی پہنچ چکی ہیں لیکن بینک سے ایل سی کھلنے کا انتظار ہے، ایل سی کھلتے ہی شپمنٹ کلیئر ہوگی او ادویات اسپتال پہنچ جائیں گی، انھوں نے مزید کہا کہ انجکشن ملتے ہی کڈنی ٹرانسپلانٹ کا عمل دوبارہ شروع کر دیں گے۔
واضح رہے کہ نئے سال کے پہلے 2 ہفتوں میں پی کے ایل آئی میں کوئی بھی کڈنی ٹرانسپلانٹ نہیں ہو سکا ہے، ٹرانسپلانٹ کے لیے استعمال ہونے والے انجکشن اے ٹی جی مارکیٹ میں ناپید ہو گئے ہیں۔
ذرائع کے مطابق اینٹی تھاموسائٹ گلوبلین بیرون ملک سے امپورٹ کروانا پڑتا ہے۔
پی کے ایل اۤئی میں روزانہ ایک مریض کا کڈںی ٹرانسپلانٹ ہوتا ہے، اور گزشتہ سال پی کی ایل آئی میں 211 مریضوں کے ٹرانسپلانٹ کیے جا چکے ہیں۔
