موغادیشو: افریقی ملک صومالیہ میں جنگجوؤں کے حملے میں 20 شہری ہلاک ہو گئے۔
تفصیلات کے مطابق مسلح گروپ نے وسطی صومالیہ کی ریاست ہرشابیل میں حملہ کر کے بیس افراد کو ہلاک کر دیا، مسلح گروپ نے خوراک سے لدے متعدد ٹرکوں کو بھی تباہ کر دیا۔
خبر رساں ایجنسی کے مطابق ٹرک بلاد وین شہر سے مہاس قصبے تک کھانے کا سامان لے کر جا رہے تھے، جنگ جوؤں نے مہاس کو امدادی خوراک لے جانے والے ٹرکوں کو جلا دیا اور گاڑیوں میں سوار لوگوں کو قتل کر دیا۔
جنگ جوؤں کا یہ گروپ اکثر فوجی اور شہری دونوں اہداف پر بم دھماکے اور اسلحے سے حملے کرتا ہے، گزشتہ ماہ بھی ایک حملے میں جنگجوؤں نے موغادیشو کے حیات ہوٹل پر دھاوا بولا تھا، جس کے نتیجے میں 20 افراد ہلاک ہو گئے تھے۔
گزشتہ روز کے حملے میں ہلاک ہونے والوں میں خواتین اور بچے بھی شامل ہیں، صومالیہ کی سرکاری نیوز ایجنسی نے کہا ہے کہ یہ حملہ القاعدہ سے جڑے دہشت گردوں نے کیا، الشباب نے ایک بیان میں کہا حملے میں اس قبیلے کے افراد کو نشانہ بنایا گیا جنھوں نے گروپ کے خلاف حکومتی فورسز کی کارروائی میں مدد کی تھی۔
ہیران کے گورنر نے ایک بیان میں کہا کہ ہلاکتوں کی تعداد بڑھ سکتی ہے۔
