لندن میں قاضی فائزعیسیٰ پرحملہ کرنے والوں کے خلاف پاکستانی ہائی کمیشن کو برطانیہ میں قانونی کارروائی کی ہدایت کردی گئی۔
ذرائع نے بتایا کہ سابق چیف جسٹس پاکستان پر حملے میں ملوث افراد کے خلاف کارروائی کرنے کے لیے وزارت خارجہ کی جانب سے پاکستان ہائی کمیشن کو ہدایت جاری کی گئی ہیں، قاضی فائز عیسی مڈل ٹیمپل سے نکلتے ہوئے پاکستانی ہائی کمیشن کی گاڑی میں موجود تھے۔
وزارت خارجہ نے کہا کہ پاکستانی ہائی کمیشن کی گاڑی اور سابق چیف جسٹس آف پاکستان پر حملہ ایک گھناؤنا فعل ہے۔
اس حوالے سے ذرائع نے مزید بتایا کہ وزارت خارجہ کی جانب سے ملزمان کو سزا دلانے کیلئے قانونی راستہ اختیار کرنے کی ہدایت کی گئی ہے۔
وفاقی وزیرداخلہ محسن نقوی نے لندن میں سابق چیف جسٹس قاضی فائز عیسی کی گاڑی پر حملہ کرنے والوں کی شناخت کے لیے اقدامات کا حکم دیا تھا۔
وزیر داخلہ کا کہنا تھا کہ پاکستان میں ایف آئی آر درج کرکے حملہ آوروں کے خلاف مزید کارروائی کی جائے گی، حملہ آوروں کے شناختی کارڈ بلاک اور پاسپورٹ منسوخ کیے جائیں گے۔
