اسلام آباد : ملک کے تعلیمی اداروں میں طلبہ میں منشیات کے استعمال کا رجحان بڑھنے کی حالیہ سروے رپورٹ کے بعد قومی اسمبلی میں توجہ دلاؤ نوٹس جمع کرادیا گیا جبکہ منشیات گروہوں کے خلاف لاہور پولیس ایکشن میں آگئی ہے۔
ملک کے تعلیمی اداروں میں منشیات کے بڑھتے رحجان کی گونج قومی اسمبلی میں بھی پہنچ گئی، حالیہ سروے رپورٹ کے مطابق مختلف تعلیمی اداروں میں دس فیصد لڑکے اور چار فیصد لڑکیوں کے منشیات استعمال کا انکشاف ہوا ہے۔
اس سے پہلے معاملہ ہاتھ سے نکل جائے، پیپلز پارٹی نےقومی اسمبلی میں توجہ دلاؤ نوٹس جمع کروادیا۔
نوٹس میں مطالبہ کیا گیا کہ وزیرصحت سنجیدگی سے نوٹس لے کرجواب دینا چاہیئے، اس مسئلے پر قومی اسمبلی میں بحث ہونی چاہیئے۔
سروے رپورٹ کے بعد لاہور میں پولیس ایکشن میں آگئی ہے، لاہور کی نجی یونیورسٹیوں میں طلباء کو منشیات فروخت کرنے میں ملوث پولیس اہلکاروں کیخلاف مقدمہ درج کرکے گرفتاری کے لئے چھاپے مارے جارہے ہیں۔
مزید پڑھیں : اسلام آباد سمیت پانچ شہروں میں 13فیصد طلبہ کے منشیات کا عادی ہونے کا انکشاف
یاد رہے کہ سینیٹ کی قائمہ کمیٹی برائے نیشنل ہیلتھ سروسز کا اجلاس میں اسلام آباد سمیت پانچ شہروں میں تیرہ فیصد طلبہ کے منشیات کا عادی ہونے کا انکشاف کیا گیا ، جس کے بعد تعلیمی اداروں میں منشیات روکنے کے لیے آئندہ اجلاس میں چیف کمشنر اسلام آباد اوراینٹی نارکوٹکس حکام کوطلب کرلیا گیا۔
