اسلام آباد : وفاقی حکومت نے بلیوایریا پراجیکٹ میں کمرشل پلاٹس کی نیلامی سے اربوں روپے حاصل کرلئے، مجموعی طور پر منصوبے میں 15 ارب روپے کا ریونیو حاصل ہونے کا امکان ہے۔
تفصیلات کے مطابق وزیراعظم عمران خان کے تعمیراتی صنعت کوفروغ دینے کے منصوبے نیوبلیوایریاپراجیکٹ میں کمرشل پلاٹس کی نیلامی سے زبردست کامیابی ملی۔
وفاقی حکومت کو بلیوایریا میں ڈھائی ہزار گز کے پلاٹس کی نیلامی سے اربوں روپے حاصل ہوئے اور موثرپالیسی سے بڑے سرمایہ کاروں کی تاریخی انویسٹمنٹ بھی ہوئی، 7 ارب کے تخمینہ والی زمین سے پہلے دن 10 ارب سے زائد حاصل کئے گئے۔
وفاقی حکومت کو منصوبے سے مجموعی طور سے 15 ارب روپے کا ریونیو حاصل ہونے کا امکان ہے۔
وزیراعظم نے مارچ میں نیوبلیو ایریا پروجیکٹ کا اعلان کیا تھااورسائٹ پر انتظامات کا جائزہ لیا، اس موقع پر انہیں نیلامی کے طریقہ کار پر بریفنگ بھی دی گئی، جس میں بتایا گیا تھا کہ منصوبے کے لیے ایف 9 پارک کے بالمقابل 170 کنال اراضی مختص کی گئی ہے۔
جدید تعمیرات اور ہائی رائز بلڈنگ پر مبنی کمرشل سٹی عالمی طرز پر تعمیر ہوگا، اوورسیز پاکستانیوں کو سرمایہ کاری کی خصوصی دعوت دی جائے اور لندن، دبئی، مانچسٹر، شکاگو اور گلاسکو سمیت بڑے شہروں میں روڈ شوز کیے جائیں گے۔
منصوبے سے حاصل رقم شہر کے ترقیاتی منصوبوں پرخرچ ہو گی اور شہرمیں تعمیراتی صنعت کو فروغ اورمعیشت میں نمایاں بہتری آئے گی جبکہ منصوبے کے دائرہ کار دوسرے بڑے شہروں میں بھی پھیلایا جائے گا۔
