آسٹن: امریکی ریاست ٹیکساس میں بم دھماکوں میں ملوث 24 سالہ مشتبہ ملزم نے خود کو دھماکہ خیز مواد سے اڑا لیا۔
امریکی میڈیا کے مطابق ٹیکساس میں ہونے والے بم دھماکوں میں ملوث ملزم نے آسٹن میں پولیس کارروائی کے دوران خود کو دھماکے سے اڑا لیا، ملزم کی گرفتاری کے لیے پولیس نے علاقے کا محاصرہ کیا تو ملزم نے گرفتاری سے بچنے کے لیے خود کو ہلاک کیا۔
امریکی تحقیقاتی ادارے ایف بی آئی کے اہلکاروں نے جائے وقوعہ سے شواہد اکٹھے کرکے تحقیقات کا آغاز کردیا، جبکہ دھماکے کے نتیجے میں ایک پولیس اہلکار بھی زخمی ہوا۔
امریکی پولیس کا کہنا ہے کہ مشتبہ ملزم نے رواں ماہ شہر کے مختلف مقامات پر 6 دھماکے کیے تھے، ملزم پارسل بیگ میں دھماکہ خیز مواد رکھ کر دھماکے کرتا تھا، بم دھماکوں کے نتیجے میں 2 افراد ہلاک اور متعدد زخمی ہوئے تھے۔
پولیس نے گزشتہ شب کوریئر سروس کے ایک اسٹور سے پارسل بک کراتے ہوئے سی سی ٹی وی کیمروں کی مدد سے ملزم کی تصاویر حاصل کی تھیں، جس میں وہ وگ لگائے ٹوپی پہنا ہوا تھا۔
امریکی صدر ڈونلڈ ٹرمپ نے سوشل میڈیا ویب سائٹ ٹویٹر پر اپنے پیغام میں بم دھماکوں میں ملوث مشتبہ ملزم کی ہلاکت کی تصدیق کرتے ہوئے تحقیقاتی اداروں کے اقدام کو سراہا۔
ایف بی آئی کے سربراہ کرس کومبز کا کہنا ہے کہ ملزم کے بارے میں مزید تحقیقات کی جارہی ہیں کہ ملزم اکیلے ہی بم دھماکوں میں ملوث ہے یا اس کا ساتھ کوئی گروہ ملوث ہے۔
