ورلڈکپ کے وارم اپ میچ میں آسٹریلیا نے پاکستان کو 14رنز سے شکست دے دی۔ پاکستان ٹیم 352رنز کے تعاقب میں337رنز بنا سکی۔
حیدرآباد میں کھیلے گئے میچ میں کپتان بابراعظم کی 90رنز کی اننگز ٹیم کےکام نہ آئی جب کہ افتخاراحمد کے 83رنز اور محمدنواز کی ففٹی بھی رائیگاں گئی۔
آسٹریلیا کی جانب سے مارنس لبوشین نے3وکٹیں حاصل کیں جب کہ پیٹ کمنز، ماورمچل مارش نے 2، 2وکٹیں کھلاڑیوں کو آؤٹ کیا۔
اس سے قبل آسٹریلیا نے ٹاس جیت کر پہلے بیٹنگ کا فیصلہ کیا جس کو کینگروز اوپنر نے بالکل درست ثابت کیا۔ مچل مارش اور ڈیوڈ وارنر نے 12.2 اوورز میں ٹیم کا 83 رنز کا جارحانہ آغاز فراہم کیا۔ اس موقع پر ڈیوڈ وارنر نصف سنچری سے دو رنز دوری پر 48 رنز کے انفرادی اسکور پر آؤٹ ہوئے۔ گرین شرٹس کو بریک تھرو دلانے والے بولر اسامہ میر تھے جن کی گیند پر کیچ کو کیچ حارث رؤف نے دبوچا۔ اسامہ میز نے ہی اپنے اگلے اوور میں مچل مارش کو چلتا کیا جنہوں نے آؤٹ ہونے سے قبل 31 رنز بنائے۔
ان کے بعد آنے والے اسٹیون اسمتھ اور لبھوشن ٹیم کے مجموعے کو 151 تک لے گئے لیکن اس موقع پر لبھوشن 40 کے انفرادی اسکور پر محمد نواز کی وکٹ بن گئے۔ دو رنز کے اضافے کے ساتھ ہی اسٹیون اسمتھ 27 رنز بنا کر حارث رؤف کا شکار ہوئے جب کہ الیکس کیری تیز رفتاری سے رنز بنانے کے چکر میں رن آؤٹ ہوگئے انہوں نے 11 رنز بنائے۔
گلین میکسویل نے 77 رنز کی جارحانہ اننگز کھیل کر ٹیم کی پوزیشن کو مستحکم کیا۔ انہوں نے 6 چھکے اور 4 چوکے لگائے جب کہ کیمرون گرین نے 40 گیندوں پر نصف سنچری اسکور کرکے میکسویل کا بھرپور ساتھ دیا۔
جوش انگلس نے 30 گیندوں پر 48 رنز کی برق رفتار اننگز کھیلی جس میں 8 چوکے اور ایک چھکا شامل تھا۔ کپتان پیٹ کمنز 2 اور گرین 50 رنز کے ساتھ ناٹ آؤٹ رہے۔ آسٹریلیا نے مقررہ پچاس اوورز میں 7 وکٹوں کے نقصان پر 351 رنز بنائے۔
پاکستان کی جانب سے اسامہ میر نے دو وکٹیں حاصل کیں جب کہ حارث رؤف، وسیم جونیئر، شاداب خان اور محمد نواز نے ایک ایک وکٹ حاصل کی۔
آئی سی سی کرکٹ ورلڈ کپ میں گرین شرٹس نے کس حکمت عملی اور فائنل الیون کے ساتھ میدان میں اترنا ہے ان تیاریوں کو حتمی شکل دینے کا آج آخری موقع ہے۔
پاکستان نیوزی لینڈ کے خلاف پہلا وارم اپ میچ بڑے اسکور کے باوجود ہارنے کے بعد ورلڈ کپ سے قبل یہ میچ جیت کر اپنے حوصلے بلند کرنا چاہے گی جب کہ آسٹریلیا جس کا پہلا وارم اپ میچ بارش کے باعث بے نتیجہ رہا ان کے مچل اسٹارک کی ہیٹ ٹرک کینگروز کے لیے حوصلے کا باعث ہوگی۔
نیوزی لینڈ سے وارم اپ میچ ہارنے کے بعد پاکستان ٹیم نے اپنی خامیاں بالکل بولنگ اور اسپنرز کی کارکردگی کو بہتر بنانے کے لیے پریکٹس پر زیادہ توجہ مرکوز کی اور دو روز کے دوران کئی طویل پریکٹس سیشن کوچز کی زیر نگرانی کیے۔
گزشتہ روز بھی ڈھائی گھنٹے کا پریکٹس سیشن کیا جس میں قومی کھلاڑیوں نے فزیکل ٹریننگ کے بعد فیلڈنگ ڈرلز کیں جب کہ نیٹ سیشن میں بولنگ اور بیٹنگ کی پریکٹس کی۔
آج دیگر دو وارم اپ میچز میں سری لنکا افغانستان کے خلاف بیٹنگ کر رہا ہے جب کہ بھارت اور نیدر لینڈ کا میچ بارش کے باعث منسوخ کر دیا گیا ہے۔
