کراچی: ضلع وسطی میں کورونا کے مزید 126 کیسز کی نشاندہی کے بعد مائیکرو اسمارٹ لاک ڈاؤن نافذ کردیا گیا ، جو یکم جون سے 15 جون تک نافذ العمل رہے گا۔
تفصیلات کے مطابق کراچی کے ضلع وسطی میں کورونا کے کیسز میں مسلسل اضافہ ریکارڈ کیا جارہا ہے ، ضلع وسطی کے 4 ٹاؤنز کے مختلف علاقوں اور گلیوں میں مائیکرو اسمارٹ لاک ڈاؤن نافذ کردیا گیا اور نوٹیفکیشن جاری کردیا۔
نوٹیفکیشن میں کہا گیا کہ مائیکرو اسمارٹ لاک ڈاون 1جون سے 15 جون تک نافذ العمل رہے گا، متاثرہ علاقوں میں گلبرگ، نارتھ کراچی، لیاقت آباد ،نارتھ ناظم آباد شامل ہیں۔
نوٹیفکیشن کے مطابق چاروں ٹاؤنز میں 126کورونا کے مریض موجود ہیں، مائیکرو اسمارٹ لاک ڈاؤن ڈی ایچ او کی نشاندہی پر لگایا گیا ہے، متاثرہ علاقوں میں آنے اور جانے والے تمام افراد کو ماسک پہننا لازمی قرار دیا گیا ہے۔
جاری نوٹیفکیشن میں کہا گیا کہ متاثرہ علاقوں کے لوگ کی غیر ضروری نقل و حرکت پرپابندی ہوگی اور علاقے میں تمام کاروباری و صنعتی سرگرمیاں معطل رہیں گی۔
کراچی: متاثرہ علاقوں میں ڈبل سواری ،فیملی اجتماع پر پابندی ہوگی اور کورونا مثبت افراد اپنے گھروں میں قرنطینہ رہیں گے، حکومت متاثرہ علاقوں میں مستحق افرادمیں راشن تقسیم کےہرممکن اقدامات کرے گی۔
