لندن: سابق وزیر اعظم نواز شریف کے لندن میں موجود فلیٹس ایون فیلڈ کے حوالے سے برطانیہ کی براڈ شیٹ کمپنی کے چیف کیوے مُوسوی نے اہم انکشافات کیے ہیں۔
اے آر وائی نیوز کے مطابق نیب کے خلاف ہرجانے کا کیس جیتنے والی کمپنی براڈ شیٹ کے چیف کیوے مُوسوی نے ایک انٹرویو میں کہا ہے کہ نواز شریف نے براڈ شیٹ عدالتی فیصلے سے متعلق سراسر جھوٹ بولا، نواز شریف کہتے ہیں وہ الزامات سے بری ہو گئے، یہ بالکل جھوٹ ہے۔
مُوسوی نے بتایا کہ وہ سمجھتے ہیں کہ براڈ شیٹ سے جان چھڑانے کی وجہ بھی شریف فیملی تھی، غیر قانونی اثاثوں کی تحقیقات سے پیچھے ہٹنے کے لیے رشوت کی پیش کش کی گئی، خود کو نواز شریف کا بھتیجا بتانے والے نے رشوت کی آفر کی تھی۔
چیف براڈ شیٹ کیوے مُوسوی کا کہنا تھا میں نے انھیں دو ٹوک بتایا بدمعاشوں سے مذاکرات نہیں کرتے، وزیر اعظم عمران خان کہیں تو ایون فیلڈ کی تحقیقات کریں گے، سب کچھ صاف ہو جائے گا، ہمارے پاس ایون فیلڈ اپارٹمنٹس سے متعلق کافی شواہد ہیں۔
انھوں نے مزید کہا کہ شریف خاندان کے لندن ہی نہیں دنیا بھر میں اثاثے ہیں، سابق صدر پرویز مشرف نے بتایا تھا کہ عدالت نے الیکشن کا حکم دیا ہے، بدمعاش پھر طاقت میں آ رہے ہیں۔
کیوے مُوسوی نے کہا سابق صدر پرویز مشرف نے نواز شریف، آصف زرداری، بے نظیر بھٹو اور دیگر کے اثاثوں کا پتا لگانے کے لیے براڈ شیٹ کی خدمات حاصل کی تھیں، نواز شریف کی جلا وطنی اور انتخابات کے بعد 2003 میں حکومت نے کمپنی سے معاہدہ منسوخ کر دیا تھا۔
انھوں نے نواز شریف کی جانب سے بھتیجے کے ذریعے رابطے کا انکشاف بھی کیا، براڈ شیٹ کے چیف نے عمران خان کو پیش کش کی کہ وہ ایون فیلڈ کی تحقیقات کا فیصلہ کریں تو سب صاف ہو جائے گا۔
